महाउधारी सरकारच्या तिजोरीत खडखडाट असल्याने राज्याच्या विविध भागांत विकासकामे करणाऱया कंत्राटदारांची 80 हजार कोटींची बिले थकली आहेत. यामुळे सरकारी कामाचा ठेका घेऊन उदरनिर्वाह चालविणाऱया कंत्राटदारांवर उपासमारीची वेळ आली आहे. लोकशाही मार्गाने आंदोलन करून न्याय मिळत नसल्याने ऊर्जा विभागाच्या कामाचा ठेका घेणाऱया जळगावातील संजय वराडे या कंत्राटदाराने मुख्यमंत्री देवेंद्र फडणवीस यांच्या ताफ्यात घुसून अंगावर रॉकेल ओतून घेत आत्मदहनाचा प्रयत्न केला. जळगाव जिह्यातील या धक्कादायक घटनेने महाराष्ट्रात खळबळ उडाली आहे.
जळगावातील आकाशवाणी चौकातून मुख्यमंत्र्यांचा ताफा जात असताना संजय वराडे या कंत्राटदाराने अंगावर रॉकेल ओतून पेटवून घेण्याचा प्रयत्न केला. पोलिसांनी त्यांना ताब्यात घेतल्याने अनर्थ टळला. संजय वराडे यांनी ऊर्जा विभागाच्या कामाचे कंत्राट घेतले असून या कामाचे पैसे थकले आहेत. त्यातच चिंचोली येथील वीज उपकेंद्राच्या कामाच्या साहित्याची चोरी झाली. यामुळे मोठे आर्थिक नुकसान होऊन त्यांच्यावर उपासमारीची वेळ आली आहे.
सरकारी अनास्था जबाबदार
निवडणुकीआधी आर्थिक नियोजन न करता कोटय़वधींची विकासकामे काढण्यात आली. यामुळे कंत्राटदार आज अडचणीत आले आहेत. संबंधित खात्याचे मंत्री, सचिव कंत्राटदारांची थकबाकी देण्याबाबत मागील दहा महिन्यांपासून चालढकल करत आहेत. आजच्या घटनेस सरकारी अनास्था जबाबदार असल्याचे महाराष्ट्र राज्य कंत्राटदार महासंघाचे अध्यक्ष मिलिंद भोसले म्हणाले.
महाराष्ट्राची आर्थिक घडी काही महिन्यांत पुरती विस्कटली असून विकासकामांवर खर्च करण्यासाठी सरकारकडे छदामही उरलेला नाही. काम करूनदेखील पैसे मिळत नसल्याने कंत्राटदार आणि त्यांच्यावर अवलंबून असणाऱया कामगारांत तीव्र संताप आहे.
Comment List