ना श्रेय मिळेल ना नोबेल पारितोषिक; खंत व्यक्त करत हिंदुस्थान- पाकिस्तान युद्ध थांबवल्याचा ट्रम्प यांचा पुनरुच्चार

हिंदुस्थान-पाकिस्तानमधील युद्ध थांबवल्याचा दावा अमेरिकेचे राष्ट्राध्यक्ष डोनाल्ड ट्रम्प यांनी अनेकदा केला आहे. त्यातच आता हे युद्ध थांबवल्याबाबत नोबेल पारितोषिक मिळावे, अशी ट्रम्प यांची इच्छा असल्याचे दिसून येत आहे. पाकिस्तानचे फिल्ड मार्शल असीम मुनीर यांनी ट्रम्प यांना नोबेल पारितोषिक मिळायला हवे, अशी वक्तव्य केल्यानंतर ट्रम्प यांना शांतीदूत असल्याचा साक्षात्कार झाला आणि हिंदुस्थान-पाकिस्तान युद्ध थांबवल्याचा त्यांनी पुनरुच्चार केला.

अमेरिकेचे अध्यक्ष डोनाल्ड ट्रम्प यांची जगभरातील अनेक आघाड्यांवर सुरू असलेली युद्धे थांबवल्याचा दावा केला आहे. आपल्या या कामसाठी आपण नोबेल पारितोषिकासाठी पात्र आहेत, असे त्यांनी म्हटले आहे. या दावा करताना त्यांनी हिंदुस्थान आणि पाकिस्तानचे युद्ध थांबवल्याचा पुनरुच्चार केला. हिंदुस्थान पाकिस्तानमधील युद्ध थांबवले तरी आपल्याला श्रेय किंवा त्यांना नोबेल शांतता पुरस्कार मिळणार नाही. मी काहीही केले तरी मला नोबेल मिळणार नाही, अशी खंतही त्यांनी व्यक्त केली आहे.

ट्रम्प यांनी सोशल मिडीयावर केलेल्या पोस्टमध्ये सहा वेळा नोबेल शांतता पुरस्काराचा उल्लेख केला. यादरम्यान त्यांनी हिंदुस्थान-पाकिस्तानमधील युद्ध थांबवण्याबाबत तसेच रवांडा आणि काँगोमधील करार, सर्बिया आणि कोसोवोमधील युद्धविराम, इजिप्त आणि इथिओपियामधील शांतता प्रस्थापित करण्याबाबत केलेले प्रयत्न, मध्य पूर्व, रशिया-युक्रेन युद्ध आणि इस्रायल-इराण युद्ध थांबवण्याबाबत केलेले प्रयत्न यांचा उल्लेख करत नोबेल शांतता पुरस्कार मिळावा, अशी इच्छा व्यक्त केली. मात्र, या सर्व प्रयत्नांनंतरही मला नोबेल शांतता पुरस्कार मिळणार नाही, अशी खंतही त्यांनी व्यक्त केली आहे.

हिंदुस्थानी सरकारने अनेक वेळा स्पष्ट केले आहे की पाकिस्तानसोबत युद्धविराम हा शेजारी देशाच्या विनंतीवरून अमेरिकन सरकारच्या हस्तक्षेपाशिवाय आणि मध्यस्थीशिवाय करण्यात आला होता. तसेच ऑपरेशन सिंदूरमुळे पाकिस्तानची तंतरली होती आणि त्यांनी युद्धबंदीचा प्रस्ताव ठेवला, त्यानंतर युद्धबंदीचा निर्णय घेण्यात आल्याचे हिंदुस्थानने अनेकदा स्पष्ट केले आहे. मात्र, आता ट्रम्प यांनी नोबेल पारितोषकाची इच्छा व्यक्त करत हिंदुस्थान-पाकिस्तान युद्ध आपणच थांबवल्याचा पुनरुच्चार केला आहे.