Sindhudurg News – दोन वॅगनार कार अन् नंबर प्लेट एकच, चौकशीअंती गौडबंगाल उलगडणार

कणकवली शहरामध्ये गुरुवारी रात्री एकाच नंबरच्या दोन वॅनगार कार आढळून आल्या. याबाबत जागरूक नागरिकांनी दिलेल्या माहितीनंतर कणकवली पोलिसांनी सकाळच्या सुमारास दोन्ही वॅनगार कार ताब्यात घेतल्या. या दोन्ही कारचा नंबर (एम एच 07 एजी8533) सेम आहे. सदर कार सत्यवान भगवान माळवे आणि विनोद विठ्ठल खंडागळे यांच्या ताब्यात होत्या, अशी माहिती कणकवली पोलिसांनी दिली. सत्यवान माळवे महसूल कर्मचारी असून विनोद खंडागळे प्राथमिक शिक्षक असल्याचे पोलिसांनी सांगितले.

शहरातील विद्यानगर भागात एकाच नंबर प्लेटच्या दोन वॅगनार कार असल्याची निनावी तक्रार कणकवली पोलीस ठाण्यात आली. पोलीस निरीक्षक मारुती जगताप, पोलीस उपनिरीक्षक अनिल हाडळ यांनी तात्काळ घटनास्थळी दाखल होत पाहणी केली. यानंतर एकाच नंबरच्या दोन्ही वॅगनार कार पोलिसांनी जप्त केल्या.

पोलिसांनी दिलेल्या माहितीनुसार, दोन्ही कारमालक एकाच इमारतीत राहतात. याबाबत उपप्रादेशिक परिवहन अधिकाऱ्यांना कळविण्यात आले असून त्यांच्याकडून पुढील कारवाई करण्यात येणार असल्याचे पीएसआय हाडळ यांनी सांगितले. दरम्यान, उपप्रादेशिक परिवहन कार्यालय ओरोस येथील मोटरवाहन निरीक्षक अतुल चव्हाण कणकवली पोलीस ठाण्यात दाखल झाले असून पुढील कारवाई सुरू केली. याबाबत आरटीओ विभाग चौकशी करणार असून त्यानंतर एकाच नंबरचे गौडबंगाल उलगडणार आहे. चौकशीअंती खोटा नंबर वापरणाऱ्या कारमालाकावर गुन्हा दाखल करण्यात येईल, असे कणकवली पोलिसांनी सांगितले.