कर्नाटकात आयटी कर्मचाऱ्यांना दहा तास काम

कर्नाटक सरकारने आयटी सेक्टरमधील कर्मचाऱ्यांच्या कामाचे तास दहा तास करण्यासाठी हालचाली सुरू केल्या आहेत. ओव्हरटाईमसह ही मर्यादा 12 तासांपर्यंत वाढण्याची शक्यता आहे. नवीन प्रस्तावात सरकारला तीन महिन्यांत ओव्हरटाईम मर्यादा 144 तासांपर्यंत वाढवायची आहे, परंतु या निर्णयाला कर्मचाऱ्यांनी जोरदार विरोध दर्शवला असून या निर्णयामुळे कर्मचाऱ्यांची पिळवणूक होणार असून हा निर्णय म्हणजे सरकारकडून कर्मचाऱ्यांवर गुलामगिरी थोपवण्याचाच प्रकार आहे, असा गंभीर आरोप कर्मचारी वर्गांनी केला आहे. जास्त वेळ काम केल्याने कर्मचाऱ्यांच्या आरोग्यावर वाईट परिणाम होईल, असे कर्नाटक आयटी युनियनने म्हटले आहे.

आंध्र प्रदेशात झाली सुरुवात

चंद्राबाबू नायडू यांच्या आंध्र प्रदेश सरकारनेही कंपन्यांना दररोज 9 तासांऐवजी 10 तास काम करण्याची याआधीच परवानगी दिली आहे. तसेच महिलांना रात्रीच्या शिफ्टमध्ये काम करण्याची परवानगी आहे. आंध्र प्रदेशात गुंतवणूक वाढवण्यासाठी हा निर्णय घेतल्याचे सरकारचे म्हणणे आहे, परंतु सरकारच्या या निर्णयाला कामगार संघटनांनी विरोध दर्शवला आहे.