इराण आणि इस्रायलमधील युद्धाने भयंकर रुप घेतले आहे. दोन्ही देश एकमेकांवर क्षेपणास्त्र हल्ले करत आहेत. या हल्ल्यात सामान्य नागरिकांचा नाहक बळी जात आहे. देशातील युद्धजन्य परिस्थिती पाहता इराणमधून आपल्या देशात परतण्याची इच्छा असणाऱ्या हिंदुस्थानी नागरिकांसाठी इराणने चार्टर्ड विमानांची व्यवस्था केली आहे.
इस्रायलशी सुरू असलेल्या युद्धामुळे इराणने आपली हवाई हद्द बंद केली आहे. मात्र हिंदुस्थानी नागरिकांना देशाबाहेर जाण्यासाठी इराणने आपली हवाई हद्द खुली केली आहे. इराणमधील सुमारे 1000 हिंदुस्थानी नागरिकांना नवी दिल्ली येथे पाठवणार आहे. इराणमधून दिल्लीला हिंदुस्थानी नागरिकांना आणण्यासाठी मशहादहून हवाई चार्टर्ड विमानांची व्यवस्था करण्यात आली आहे. आज रात्री हिंदुस्थानी नागरिक इराणहून नवी दिल्लीला पोहोचतील, असे इराणच्या स्थानिक अधिकाऱ्यांनी सांगितले. प्रादेशिक तणावाच्या काळात इराण हिंदुस्थानी नागरिकांची सुरक्षितता सुनिश्चित करू इच्छित असल्याचेही अधिकाऱ्यांनी नमूद केले.
हिंदुस्थानच्या सरकारने दोन दिवसांपूर्वी ‘ऑपरेशन सिंधू’ सुरू केले आहे. या कारवाईअंतर्गत इराणमध्ये अडकलेल्या हिंदुस्थानी नागरिकांना त्यांच्या मायदेशी परतण्यास मदत करत आहे. ही कारवाई सुरू केल्यानंतर इराणने हिंदुस्थानी नागरिकांसाठी चार्टर्ड विमानांची व्यवस्था केली.
दरम्यान, इस्रायलकडून होत असलेल्या हल्ल्यांचा निषेध करण्याचे आवाहन इराणने हिंदुस्थानला केले आहे. जर हिंदुस्थानने असे केले नाही तर ते हल्लेखोरांना प्रोत्साहन दिल्यासारखे होईल, असे इराणने म्हटले आहे. इस्रायल स्वतःला बळी म्हणवून हल्लेखोराची भूमिका बजावतो.
Comment List