रणथंबोरची प्रसिद्ध वाघीण ‘अ‍ॅरोहेड’चा मृत्यू; मेंदूच्या ट्युमरमुळे वयाच्या 11 व्या वर्षी निधन

रणथंबोर नॅशनल पार्कमधील प्रसिद्ध वाघीण ‘अ‍ॅरोहेड’ (T-84) हिचा मेंदूच्या ट्युमरमुळे गुरुवारी मृत्यू झाला, अशी माहिती वनविभागाच्या अधिकाऱ्यांनी दिली आहे. अ‍ॅरोहेड ही रणथंबोरची दंतकथा बनलेली वाघीण ‘मच्छली’ हिची नात होती.

11 वर्षांची अ‍ॅरोहेड काही दिवसांपूर्वीच एका मगरीला शिकार करतानाचा व्हिडीओ व्हायरल झाल्यानंतर चर्चेत आली होती. तिच्या या शिकारीने लोकांना मच्छलीची आठवण करून दिली – जिचे वर्णन अनेकदा ‘रणथंबोरची राणी’ आणि ‘मगरीची शिकारीण’ असं केलं जायचं.

वनविभागाचे अधिकारी आणि वन्यजीवप्रेमींनी अ‍ॅरोहेडला श्रद्धांजली अर्पण केली आणि नंतर तिचे दहन करण्यात आले.

‘अ‍ॅरोहेडने मच्छलीची परंपरा पुढे नेली’, असे वरिष्ठ वनमार्गदर्शक शकीर अली यांनी सांगितले.

रणथंबोरचे क्षेत्र संचालक अनुप के.आर. यांच्या मते, अ‍ॅरोहेडचा जन्म फेब्रुवारी 2014 मध्ये झाला होता. ती प्रामुख्याने झोन 2, 3, 4 आणि 5 मध्ये दिसून यायची, विशेषतः नाल घाटी आणि राजबाग तलाव हे तिचे आवडते क्षेत्र होते.

‘ती केवळ देखण्या रूपामुळेच नव्हे, तर पार्कमधील वाघांची संख्या वाढवण्यात मोलाची भूमिका बजावल्यामुळेही ओळखली जायची’, असे अनुप यांनी सांगितले.

अ‍ॅरोहेडने चार वेळा पिल्लांना जन्म दिला होता. ती एकूण दहा पिल्लांची आई होती, यापैकी सहा अजूनही जिवंत आहेत. शेवटचा बछडा 2023 मध्ये झाला होता.