जेजुरी शहर, औद्योगिक वसाहत, मोरगाव व इतर 36 गावांना पाणीपुरवठा करणाऱ्या नाझरे धरणातील पाणीसाठ्यात मान्सूनपूर्व पावसामुळे मोठी वाढ झाली आहे. नाझरे धरणाची पाणीसाठा क्षमता 788 दशलक्ष घनफूट एवढी असून 200 दशलक्ष घनफूट मृत पाणीसाठा मानला जातो. यापूर्वी धरणातील उपयुक्त पाणीसाठा संपून मृत पाणी साठ्यातील पाणी वापरले जात होते. मात्र, आता पाणीपातळीत वाढ होऊन 240 दशलक्ष घनफूट एवढा पाणीसाठा उपलब्ध झाला आहे. या धरणावर पिण्याच्या पाण्याच्या व शेतीला पाणीपुरवठा करणाऱ्या अनेक योजना अवलंबून आहेत. सासवड परिसरातील गराडे, नारायणपूर, चांबळी या परिसरात मान्सूनपूर्व पाऊस भरपूर झाल्याने कऱ्हा नदी दुथडी भरून वाहत आहे. हे पाणी चार दिवसांपूर्वीच नाझरे धरणापर्यंत पोहोचले. त्यामुळे धरणाच्या पाणीपातळीत वाढ होत आहे. सासवड ते जेजुरीतील नाझरे धरण हे अंतर साधारणतः 20 किलोमीटर आहे. यापूर्वी नदीचे पात्र कोरडे पडले होते, आता कऱ्हा नदी वाहत असल्याने नदीच्या पात्राशेजारील वाटेत असणारे सर्व नाला बंडिंग, पाझरतलाव भरले आहेत. पावसाळा सुरू झाल्यानंतर नाझरे धरण लवकर भरण्याची शक्यता निर्माण झाली आहे. सासवड परिसरात पुरेसा पाऊस झाल्यावर कऱ्हा नदीतून नाझरे धरणात मोठ्या प्रमाणात पाणी येते व धरण पूर्ण क्षमतेने भरते. जेजुरीत दररोज हजारो भाविक खंडोबाच्या दर्शनासाठी येतात. भाविकांना याच धरणातून पाणीपुरवठा केला जातो. तर धरणातील पाणीसाठा कमी झाल्यास औद्योगिक वसाहतीलाही अनेक वेळा पाणीटंचाईला तोंड द्यावे लागते. धरणात पाणीसाठा वाढत असल्याने सर्वत्र समाधानाचे वातावरण आहे.
नाझरे धरण लवकर भरण्याची शक्यता
मागील वर्षी मे महिन्यात नाझरे धरण कोरडे ठणठणीत पडले होते. त्यातील गाळही मोठ्या प्रमाणात काढण्यात आला. यंदा मात्र धरणात 195 दशलक्ष घनफूट एवढा मृत पाणीसाठा शिल्लक आहे. आता कन्हा नदीचे पाणी नाझरे धरणात पोहोचल्याने पाणीसाठा वाढत आहे. पुरेसा पाऊस झाल्यास धरण लवकर भरण्याची शक्यता आहे, असे नाझरे धरणाचे शाखा अभियंता अनिल घोडके यांनी सांगितले.
Comment List