मुख्यमंत्र्यांना जालन्यात येण्यास लाज वाटते का? विराट मोर्चातील शेतकऱ्यांचा सवाल

राज्य सरकारच्या नवीन पीक विमा योजनेतून स्थानिक नैसर्गिक आपत्ती हा घटक वगळल्याने शेतकऱ्यांतून तीव्र संताप व्यक्त करण्यात येत असून, आज विविध मागण्यांसाठी शेतकऱ्यांनी थेट जालन्यातील गांधीचमनपासून ते जिल्हाधिकारी कार्यालयापर्यंत भव्य मोर्चा काढून संताप व्यक्त केला. यावेळी ‘मुख्यमंत्री साहेब जालन्याला यायला तुम्हाला लाज वाटते का?’ असा सवालही शेतकऱ्यांनी व्यक्त केला.

राज्य सरकारने नवीन पीकविमा योजनेतून स्थानिक नैसर्गिक आपत्ती हा घटक वगळण्यात आल्याचा आरोप करत हा घटक पुन्हा पीकविमा योजनेत समाविष्ट करण्याच्या मागणीसाठी आज ३० मे रोजी दुपारी १ वाजता जालन्यातील गांधी चमन ते जिल्हाधिकारी कार्यालयावर भव्य रॅली काढण्यात आली.

जिल्ह्यातील शेतकरी संघर्ष समितीतील शेतकरी या रॅलीत सहभागी झाले होते. स्थानिक नैसर्गिक आपत्ती हा घटक पीकविमा योजनेत नसल्यास एकाही शेतकऱ्याला नुकसान भरपाई मिळणार नाही. गेल्यावर्षीचं अतिवृष्टी अनुदान शेतकऱ्यांना देण्यात यावे. विहीरींचे थकलेले अनुदान देण्यात यावे, अशीही मागणी शेतकऱ्यांकडून करण्यात आली. जालन्यातील शेतकऱ्यांना सरकारी योजनेच्या लाभापासून वंचित ठेवाल तर मुख्यमंत्र्यांना त्यांची जागा दाखवून देऊ, असा इशारा यावेळी शेतकऱ्यांकडून देण्यात आला.

२०२४ मध्ये जालना जिल्ह्यातील काही भागांत अतिवृष्टी झाली होती. या अतिवृष्टीग्रस्त शेतकऱ्यांना अद्यापपर्यंत शासनाकडून मदत मिळालेली नाहीये. तसेच २०२४ मधील फळ पिक विमा अद्यापपर्यंत कशी शेतकऱ्यांना वितरित करणे बाकी आहे. त्यामुळे २०२४ मधील अतिवृष्टी मदत आणि फळ पिक विमा शेतकऱ्यांना तातडीने वितरित करून स्थानिक नैसर्गिक आपत्ती हा घटक पिक विमा योजनेत समाविष्ट करावा अशी मागणी या रॅलीच्या माध्यमातून शेतकऱ्यांनी केली आहे.

शिवाय मुख्यमंत्र्याना जालन्याला यायला लाज वाटती का? आमचे फक्त मतदानचा तुम्हाला हवे आहे काय? शेजारील बुलढाणा, परभणी या जिल्ह्यापर्यंत तुम्ही येत आहात मग जालन्याला का येत नाहीत असा ही सवाल शेतकऱ्यांनी केला. यावेळी शेतकऱ्यांच्या या भव्य रॅलीने सर्वांचेच लक्ष वेधून घेतलं होते. जिल्हाधिकाऱ्यांना मागण्यांचे निवेदन देऊन या रॅलीचा समारोप करण्यात आला. या रॅलीत मोठ्या संख्येने शेतकरी सहभागी झाले होते.