Ratnagiri News – दोन कोटींचे मनी लाँड्रिंग झाल्याचे सांगत 61 लाखांना गंडा, आरोपीला दिल्लीतून अटक

मिनिस्ट्री ऑफ कम्युनिकेशन मंत्रालयातून बोलतोय सांगून तुमच्या नावाने बॅंक खात्यातून दोन कोटी रूपयांचे मनी लाँड्रिंग झाले असल्याचे सांगत लाखांचा गंडा घातला. याप्रकरणी रत्नागिरी पोलिसांनी 61 लाख 19 हजार 80 रूपयांना गंडा घालणाऱ्या आरोपीला दिल्ली येथून अटक केली आहे. राजीव विश्वनाथ तिवारी असे अटक आरोपीचे नाव आहे. आरोपीला न्यायालयात हजर केले असता चार दिवसांची पोलीस कोठडी सुनावण्यात आली आहे.

आरोपीने फिर्यादीला फोन करून आपण मिनिस्ट्री ऑफ कम्युनिकेशन मंत्रालयातून बोलतोय सांगितले. यानंतर आपले सीम कार्ड बंद होत असून तक्रारीसाठी पोलिसांकडे फोन जोडत आहे असे सांगितले. दुसऱ्या व्यक्तीने पोलीस अधिकारी असल्याचे सांगून आपल्या नावाने कॅनरा बॅंकेत खाते उघडण्यात आले असून त्यामधून 2 कोटी रुपयांचे मनी लाँड्रिंग झाल्याचे सांगितले. फिर्यादीला 61 लाख 19 हजार 80 रूपये भरण्यास सांगून फसवणूक केली.

पोलिसांनी या गुन्ह्यांत झालेल्या आर्थिक व्यवहाराची बॅंकांकडून तपासणी केली. तपासात राजीव विश्वनाथ तिवारी हा आरोपी सध्या दिल्लीत असल्याचे निष्पन्न झाले. कोणतेही मोबाईल लोकेशन नसताना पोलिसांनी आरोपीला शिताफीने पकडले.