प्रियकराने लॉटरीत जिंकले 30 कोटी, सर्व पैसे घेऊन प्रेयसी दुसऱ्या बॉयफ्रेंडसोबत फरार

पैसा भल्याभल्यांना भुरळ पाडतो आणि पैशांच्या मोहापाई अनेक नाती उद्ध्वस्त होतात. अशा अनेक घटना तुमच्या पाहण्यात किंवा वाचण्यात आल्या असतील. असाच काहीसा प्रकार एका प्रियकरासोबत घडला आहे. लॉटरीमध्ये जिंकलेले 30 कोटी घेऊन प्रेयसी फरार झाल्याची तक्रार पोलीस स्थानकात दाखल झाली आहे. कोर्टापर्यंत हे प्रकरण गेलं असून प्रियकराला या सर्व प्रकारामुळे चांगलाच मनस्ताप झाला आहे.

कॅनडातील लॉरेन्स कँपेम्बलने 2024 साली लॉटरीचं तिकीट खरेदी केलं होतं. नंतर त्याने ते 30 कोटी रुपये जिंकले. परंतु वैध ओळखपत्र नसल्यामुळे, त्याला रक्कम काढता येत नव्हती. त्यामुळे त्याला लॉटरी अधिकाऱ्यांनी दुसऱ्याच्या नावाने पैसे काढण्याचा सल्ला दिला होता. त्यामुळे त्याने प्रेयसी क्रिस्टल अँन मॅकेवर विश्वास दाखवला आणि तिच्या नावाने पैसे काढले. बँकेत खातं नसल्यामुळे त्याने सर्व रक्कम क्रिस्टलच्या खात्यावर जमा केली होती. त्यानंतर काही दिवस दोघेही खूश होते. परंतु त्यानंतर अचानक क्रिस्टलने लॉरेन्सशी संबंध तोडला. त्याला सोशल मीडियासह सर्व ठिकाणाहून ब्लॉक केलं. त्यानंतर लॉरेन्सने शोधाशोध केली असता क्रिस्टल दुसऱ्या व्यक्तिसोबत आनंदात दिवस घालवत असल्याची त्याला माहिती मिळाली. त्यानंतर त्याने क्रिस्टलविरुद्ध गुन्हा दाखल केला. त्याचबरोबर चुकीचा सल्ला दिला म्हणून वेस्टर्स कॅनडा लॉटरी कॉर्पोरेशन आणि मॅनिटोबा लिकर अँड लॉटरी यांच्याविरोधातही गुन्हा दाखल केला. आज तकने यासंदर्भात वृत्त दिले आहे.