धारावी पुनर्विकास प्रकल्पाच्या नावाखाली राज्य सरकारने मदर डेअरीची 21 एकरची जमीन अदानी समूहाला दिली. डेअरीची जमीन मुंबई आणि मुंबईकरांसाठी पर्यावरणदृष्टय़ा संवेदनशील असूनही केवळ अदानीसाठी ती हस्तांतरित करण्यात आली आहे. केंद्र आणि राज्य सरकारच्या मदतीने मुंबईकरांच्या हक्काच्या जमिनी लुटण्याचा भस्म्या रोग अदानीला झाला आहे. मात्र, ही जागा अदानीच्या घशात घालण्याऐवजी इथे वनस्पती उद्यान उभारा, स्थानिकांसाठी सोयीसुविधा उभारा, अशी मागणी करत आज कुर्ला येथे मुंबई काँग्रेस अध्यक्ष खासदार वर्षा गायकवाड यांच्या नेतृत्वाखाली जोरदार आंदोलन करण्यात आले.
कुर्ल्यातील मदर डेअरीची 21 एकर जागा अदानीला धारावी पुनर्वसन प्रकल्पासाठी देण्याविरोधात कुर्लावासीयांनी खासदार वर्षा गायकवाड यांच्या नेतृत्वाखाली आंदोलन केले. यावेळी मोठा पोलीस बंदोबस्त ठेवण्यात आला होता. वर्षा गायकवाड म्हणाल्या, मोदानी अॅण्ड पंपनी लोकांचे हक्क हिरावून घेत आहे, मुंबईकरांच्या हक्काच्या जागा बळकावल्या जात आहेत. मात्र, ही लूट करणा-या चोरांनाच सरकार सुरक्षा देत आहे. मात्र, आम्ही मुंबईच्या हक्कासाठी, मुंबईकरांच्या भविष्यासाठी या अदानी सरकारविरुद्ध लढत राहू, असा निर्धार त्यांनी व्यक्त केला. यावेळी आमदार ज्योती गायकवाड, सुभाष भालेराव, सुरेशचंद्र राजहंस, महेंद्र मुणगेकर, संदीप शुक्ला, अवनीश सिंह, कचरू यादव, माजी नगरसेवक अशरफ आझमी, वंदना साबळे, अजंता यादव, इंदूप्रकाश तिवारी, राजेश इंगळे यांच्यासह पदाधिकारी, कार्यकर्ते, रहिवासी उपस्थित होते.
कोटय़वधीची जमीन अदानीला कवडीमोलाने
कुर्ला मदर डेअरीच्या जागेचे बाजारमूल्य शेकडो कोटी रुपयांत आहे, मात्र भाजपने ही जमीन अदानीला कवडीमोलाने दिली आहे. मुंबईत भाजप सरकारच्या आशीर्वादाने अदानीची महालूट सुरू आहे. ही लुटालूट थांबता थांबत नाही. त्यासाठी आता धारावीसह मुंबईकरांनी रस्त्यावर उतरण्याची वेळ आली आहे, असे आवाहनही त्यांनी केले.
Comment List