गोगावलेंचा आणखी एक कारनामा ; परवानगीविनाच सावित्रीतील गाळ काढण्याचे घाईघाईत उद्घाटन

वादग्रस्त विधानांमुळे कायमच चर्चेत असलेले मिंधेंचे महाड येथील आमदार भरत गोगावले यांचा आणखी एक कारनामा समोर आला आहे. सावित्री नदी पात्रातून गाळ उपसण्याची कोणतीही परवानगी नसताना गोगावले यांनी आज चक्क या गाळ काढण्याच्या कामाचे स्वयंघोषित उद्घाटन केले. याची गंभीर दखल शिवसेना (उद्धव बाळासाहेब ठाकरे) पक्षाने घेतली आहे. पक्षाचे महाड विधानसभा उपजिल्हा समन्वयक सोमनाथ ओझर्डे यांनी प्रांताधिकाऱ्यांकडे तक्रार केली असून या प्रकरणाची चौकशी करून गोगावलेंवर फौजदारी गुन्हा दाखल करावा, अशी मागणी केली आहे.

मी मंत्री असल्याने मी करीन तीच पूर्व दिशा असा भरत गोगावले यांचा महाडमध्ये कारभार सुरू आहे. महाडमधील सावित्री नदी पात्रातील गाळ काढण्याचे उद्घाटन आज गोगावले यांनी धावत पळत जाऊन केले. परंतु हा गाळ उपसण्याची कोणतीही शासकीय परवानगी त्यांनी घेतली नसल्याचे उघड झाले. शिवसेनेचे महाड विधानसभा उपजिल्हा समन्वयक सोमनाथ ओझर्डे यांनी गोगावलेंच्या या कारनाम्याचा पत्रकार परिषद घेऊन भंडाफोड केला. ते म्हणाले, गोगावलेंच्या या गाळ उपसा उद्घाटनाबाबत मी पाटबंधारे विभागाच्या कार्यकारी अभियंत्यांना विचारले असता त्यांनी गाळ काढण्याच्या कामाच्या मंजुरीची प्रक्रिया अद्याप सुरू आहे असे मला स्पष्टपणे सांगितले. याचाच अर्थ कोणतीही वैध शासकीय परवानगी मिळाली नसतानाही मंत्री भरत गोगावले यांनी कायदेशीर प्रक्रियेचे उल्लंघन करून या कामाचे उद्घाटन केले आहे.

लवकरात लवकर कारवाई करा !
याप्रकरणी ओझर्डे यांनी उपविभागीय अधिकाऱ्यांकडे तक्रार दाखल केली आहे. या प्रकरणात लवकरात लवकर गुन्हा दाखल झाला नाही तर संबंधित मंत्री आणि जबाबदार अधिकाऱ्यांची नावे नमूद करून सीआरपीसी कलम 156 (3) अन्वये थेट न्यायालयात अर्ज दाखल केला जाईल, असा इशारा त्यांनी अधिकाऱ्यांना दिला आहे.