आदित्य ठाकरे यांच्या वाढदिवसानिमित्त सामाजिक उपक्रम, ‘मातोश्री’वर उद्या दुपारी 1 ते सायंकाळी 5 या वेळेत शुभेच्छांचा स्वीकार करणार

शिवसेना नेते, युवासेना प्रमुख आदित्य ठाकरे यांच्या वाढदिवसानिमित्त मुंबईसह राज्यभरात विविध सामाजिक उपक्रमांचे आयोजन करण्यात आले आहे. त्याबद्दल आभार मानतानाच, शुक्रवारी वाढदिवशी दुपारी 1 ते सायंकाळी 5 या वेळेत आपण ‘मातोश्री’ निवासस्थानी तमाम शिवसैनिक आणि युवासैनिकांच्या शुभेच्छांचा स्वीकार करणार असल्याचे आदित्य ठाकरे यांनी नमूद केले आहे.

आदित्य ठाकरे यांच्या वाढदिवशी शिवसैनिक आणि युवासैनिकांमध्ये मोठा उत्साह पाहायला मिळतो. आदित्य ठाकरे यांना शुभेच्छा देण्यासाठी राज्याच्या कानाकोपऱयातून हजारोंच्या संख्येने शिवसैनिक ‘मातोश्री’ येथे येतात. या शिवसैनिकांसाठी आदित्य ठाकरे यांनी आवाहन केलं आहे. ‘आपणा सर्वांना भेटण्यासाठी आणि आपल्या शुभेच्छा व आशीर्वाद स्वीकारण्यासाठी मी शुक्रवारी दुपारी 1 ते 5 या वेळेत ‘मातोश्री’ येथे उपलब्ध असेन’, असे त्यांनी सांगितले.

हे प्रेम आणि आशीर्वाद सदैव राहू द्या!

आदित्य ठाकरे यांच्या वाढदिवसानिमित्त राज्यभरात विविध सामाजिक आणि लोकोपयोगी उपक्रम राबवण्यात येत आहेत. त्यात रक्तदान शिबीर, शालेय मुलांना वह्यावाटप, विद्यार्थी गुणगौरव, अन्नदान, रुग्णांना फळवाटप, वृक्षारोपण अशा विविध उपक्रमांचा समावेश आहे. ‘आपले हे प्रेम आणि आशीर्वाद सदैव माझ्यासोबत असावेत’, अशा भावना व्यक्त करत या सामाजिक उपक्रमांबद्दल आदित्य ठाकरे यांनी सर्वांचे आभार मानले.