रोह्याचा दानियाल चोगले याने एव्हिएशन क्षेत्रात गगनभरारी घेत यश मिळवले आहे. ए ३२० ते एटीआर ७२ या दोन्ही विमानांवर अधिकृत स्वाक्षरी करणारे अधिकारी म्हणून त्याची नियुक्ती झाली असून दानियाल कोकणातील पहिले एअरक्राफ्ट इंजिनियर ठरले आहेत. या यशाबद्दल दानियाल चोगले यांच्यावर अभिनंदनाचा वर्षाव होत आहे.
दानियालचे पहिली ते बारावीपर्यंतचे शिक्षण रोह्यातील जे.एम. राठी स्कूलमध्ये झाले आहे. त्यानंतर पुण्याच्या हिंदुस्थान एरोस्पेस अॅण्ड इंजिनीयरिंग कॉलेजमधून एअरक्राफ्ट इंजिनीयरिंगचे शिक्षण पूर्ण केले. दानियालचा व्यावसायिक प्रवास विस्तार एअरलाईन्स या कंपनीतून सुरू झाला. तिथे साडेतीन वर्षे सेवा दिल्यानंतर अनुभवाच्या जोरावर त्यांनी नावाजलेल्या इंडिगो एअरलाईन्स या कंपनीच्या सेवेत रुजू झाले. इंडिगो एअरलाईन्स या कंपनीने दानियालला अॅडवान्स्ड एअरबस ए ३२० आणि एटीआर ७२ विमानांची तांत्रिक जबाबदारी दिली आहे. दानियालची गगनभरारी तरुणांसाठी एक प्रेरणा असून मोठी स्वप्नं उराशी बाळगून अहोरात्र मेहनत घेतली तर यश नक्कीच मिळते हे त्याने सिद्ध करून दाखवले आहे.
माझा जन्म रोह्यासारख्या छोट्याशा गावात झाला आहे. माझे आई-वडील आणि रोहेकर जनतेच्या आशीर्वादामुळेच मला हे यश मिळाले आहे. कुटुंबीयांनी दिलेली साथ माझ्यासाठी एक नवीन ऊर्जा आणि काम करण्यासाठी नवीन उमेद देत असते.
– दानियाल चोगले
Comment List