बकरा मंडीत विद्यार्थ्याची बनवाबनवी, बनावट स्क्रीनशॉट दाखवून बकरा घेऊन गेला

मालाडमध्ये राहणाऱया एका विद्यार्थ्याने घासाघीस करून 30 हजारांत देवनार मंडईत राजस्थानमधील एका व्यापाऱयाकडून बकरा विकत घेतला आणि पैसे ऑनलाईन पाठविल्याचा स्क्रीनशॉट तयार करून व्यापाऱयांची फसवणूक केली. देवनार पोलिसांनी वेळीच त्याच्या मुसक्या आवळल्या.

राजस्थानचे असलेले बिरजू चितोडीया व त्याची आई रामुबाई चितोडीया हे दोघे त्यांचे सात ते आठ बकरे विकण्यासाठी देवनार मंडीत आले होते. जास्त पैसे मिळतील या आशेवर ते होते. दरम्यान मालाडमध्ये राहणारा व बीएस्सी फार्माच्या दुसऱया वर्षाला शिकणारा तरुण 4 तारखेला मंडीत गेला. त्याने बरीच घासाघीस करून चितोडीया यांच्याकडून 30 हजार 200 रुपयांत बकरा खरेदी केला. त्यानंतर त्याने बनावट स्क्रीनशॉट तयार करणाऱया अॅपचा वापर करून 30 हजार 200 रुपये ऑनलाईन पाठविल्याचा स्क्रीनशॉट तयार करून तो व्यापाऱयास दाखविला. नेटवर्क कमी आहे, पैसे थोडय़ा वेळात येतील असे सांगून तो बकरा घेऊन निघून गेला. पण 24 तास उलटूनही पैसे न आल्याने बिरजूने बँकेत जाऊन विचारपूस केली. तेव्हा तुमच्या खात्यात रक्कम आलेली नाही असे बँकेत त्यांना सांगण्यात आले. फसवणूक झाल्याचे लक्षात येताच त्यांनी देवनार पोलिसांत तक्रार दिली होती.