मराठी माणसाला ‘पटक पटक के मारेंगे’ ची भाषा करणारे भाजपचे मस्तवाल खासदार निशिकांत दुबे यांनी सध्या मराठी माणसाचा चांगलाच धसका घेतला आहे. नवीन महाराष्ट्र सदनात आज पार पडलेल्या संसदरत्न पुरस्कार सोहळ्याला ‘पुरस्कारार्थी’ असूनही दुबेंनी दांडी मारली. मराठी माणसाला फुकाच्या धमक्या देणाऱ्या दुबेंचीच प्रत्यक्षात तंतरल्याचे आजच्या घटनेवरून स्पष्ट झाले आहे.
या वर्षीचा संसदरत्न पुरस्कार सोहळा नवीन महाराष्ट्र सदनात होणार असल्यामुळे मराठी भाषेबद्दल व मराठी माणसांबद्दल गरळ ओकणाऱ्या निशिकांत दुबे यांनी घाबरून या कार्यक्रमालाच दांडी मारली. आज सतरा जणांना हा पुरस्कार देण्यात आला.
या कार्यक्रमात मराठी लोकांनी जाब विचारला असता तर त्यांना पळताभुई थोडी झाली असती. त्यामुळे पटक पटक के मारेंगेची भाषा करणारे निशिकांत दुबे घाबरून घरात दडून बसले.
दुबे सावध का झाले?
काही दिवसांपूर्वीच संसदेच्या लॉबीत महाराष्ट्रातील वर्षा गायकवाड, शोभा बच्छाव व प्रतिभा धानोरकर या महिला खासदारांनी दुबे यांना, तुम्ही मराठी माणसाबद्दल असे कसे बोलू शकता, असा सवाल केला होता. त्यावेळीही दुबेंना तोंड लपवून जावे लागले होते. या खासदारांपैकी संसदरत्न मिळालेल्या वर्षा गायकवाड यांचीही महाराष्ट्र सदनात भेट झाली असती तसेच शिवसैनिक व महाराष्ट्रप्रेमी मंडळी भेटली असती. त्यांच्याकडून प्रसाद मिळाला असता याचा अंदाज आल्यानेच दुबेने कार्यक्रमाला दडी मारली.
…आणि रविकिशन मराठी बोलू लागले
याच कार्यक्रमात गोरखपूरचे खासदार, सिनेअभिनेते असलेल्या रविकिशन यांनी मात्र, मराठीत बोला असा आग्रह मीडियाच्या प्रतिनिधींनी केल्यानंतर मराठीत पत्रकारांशी संवाद साधला. रविकिशन यांची फिल्मी कारकिर्द मुंबईतच घडली. ते गोरेगावात राहतात. रविकिशन यांनी आढेवेढे न घेता आपल्याला मराठीत बोलता येते हेही यावेळी सप्रमाण दाखवून दिले.
Comment List