उद्धव ठाकरे यांचा आज वाढदिवस, ‘मातोश्री’ निवासस्थानी शुभेच्छा स्वीकारणार

शिवसेना पक्षप्रमुख उद्धव ठाकरे यांचा आज, रविवारी वाढदिवस आहे. मुंबईसह राज्यभरात त्यांचा वाढदिवस मोठय़ा उत्साहाने साजरा होणार असून वाढदिवसानिमित्त ‘मातोश्री’ निवासस्थानी उद्धव ठाकरे शुभेच्छांचा स्वीकार करणार आहेत. त्यांच्या वाढदिवसानिमित्त शिवसैनिकांमध्ये प्रचंड उत्साहाचे वातावरण आहे. उद्धव ठाकरे यांच्या वाढदिवसानिमित्त मुंबईसह राज्यभरात  सामाजिक आणि लोकोपयोगी कार्यक्रमांचे आयोजन करण्यात आले आहे.

शिवसेना पक्षप्रमुख उद्धव ठाकरे यांचा वाढदिवस म्हणजे शिवसैनिकांसाठी एक उत्सवच असतो. वाढदिवसाच्या निमित्ताने मुंबईसह राज्यभरातून हजारो शिवसैनिकांचे जथेच्या जथे ‘मातोश्री’ निवासस्थानी त्यांना शुभेच्छा देण्यासाठी येणार आहेत. त्यामुळे सकाळपासूनच रात्री उशिरापर्यंत वांद्रय़ाचा कलानगर परिसर शिवसैनिक आणि भगव्या वातावरणाने फुलून जाणार आहे. ‘मातोश्री’ निवासस्थानी खुद्द उद्धव ठाकरे यांना भेटण्याची संधी मिळत असल्याने शिवसैनिकांचा उत्साह शिगेला पोहोचला आहे. दरवर्षी लहानथोरांसह महिला रणरागिणींची संख्याही मोठी असते. विशेष म्हणजे उद्धव ठाकरे यांना शुभेच्छा देण्यासाठी हजारोंची गर्दी होत असली तरी अगदी सकाळपासून अगदी शिस्तबद्ध पद्धतीने हा सोहळा पार पडत असतो.

मुंबईसह राज्यभरात कलासंस्कृतीचे दर्शन

उद्धव ठाकरे यांच्या वाढदिवसानिमित्त मुंबईसह राज्यभरात  सामाजिक आणि लोकोपयोगी कार्यक्रमांचे आयोजन करण्यात आले आहे. शिवाय महाराष्ट्राच्या कलासंस्कृतीचे दर्शन घडवणाऱ्या कार्यक्रमांचेही आयोजनही करण्यात आले आहे.