शिधापत्रिकांची ‘ई-केवायसी’ करण्यास अनास्था; साताऱ्यात अजूनही साडेतीन लाख जणांनी केले नाही प्रमाणिकरण

शिधापत्रिकाधारकांसाठी ई-केवायसी करणे बंधनकारक असताना सातारा जिह्यात अजूनही 3 लाख 61 हजार 209 जणांनी अद्यापि ई-केवायसी प्रमाणिकरण केलेले नाही. धान्यापासून कुणीही वंचित राहू नये, यासाठी शासनाने 30 जूनपर्यंत मुदतवाढ दिली आहे. दरम्यान, 36 हजार 483 जणांचे आधार कार्ड व रेशन कार्डकरील नाव न जुळल्याने त्यांची ई-केवासयी रिजेक्ट करण्यात आली आहे.

सातारा जिह्यात एकूण 17 लाख 92 हजार 84 शिधापत्रिकाधारक आहेत. त्यापैकी 9 लाख 49 हजार 365 जणांचे केवायसी मंजूर झाले आहे. 36 हजार 483 जणांचे आधार कार्ड व रेशन कार्डकरील नावे जुळली नाहीत, तर 4 लाख 81 हजार 510 केवायसी मंजुरीसाठी प्रलंबित आहेत. अजूनही 3 लाख 61 हजार 209 लाभार्थी म्हणजेच 20.16 टक्के ई-केवायसी बाकी आहेत.

गेल्या आठ महिन्यांपासून शासनाने रेशन कार्डसाठी ई-केवायसी प्रक्रिया सुरू केली आहे. वेळोवेळी मुदतवाढ देण्यात आली आहे. 28 फेब्रुवारी, 31 मार्च आणि त्यानंतर 31 मे, अशी मुदतवाढ दिली होती. तरीही, मोठय़ा संख्येने कार्डधारकांनी ई-केवायसी पूर्ण केलेली नाही. त्यामुळे आता 30 जूनपर्यंत पुन्हा केवायसीसाठी मुदत द्यावी लागली आहे.

ज्या रेशन दुकानदारांकडील लाभार्थ्यांची ई-केवायसी कमी प्रमाणात झाली आहे, त्या दुकानदारांनी लाभाथ्यांशी वैयक्तिक संपर्क साधून त्यांना ई-केवायसीसाठी करण्याबाबत प्रबोधन करावे, असे आदेश पुरवठा विभागाने दिले आहेत. ई-केवायसी प्रक्रिया पूर्ण न झाल्यास योग्य ती कारवाई करण्यात येईल, असा इशाराही देण्यात आला आहे. पुरवठा विभागाकडून ई-केवायसीसाठी पाठपुरावा सुरू आहे. याबाबत तहसील कार्यालयांना दोन महिन्यांपूर्वी पत्र पाठवून ई-केवायसी प्रक्रिया तातडीने पूर्ण करण्याच्या सूचना केल्या होत्या. त्यानुसार सर्व तालुक्यांत ई-केवायसी मोहीम प्रभावीपणे राबवण्यात आली. तरीही 3 लाख 61 हजार 209 जणांनी अद्याप ई-केवायसी प्रमाणिकरण केलेले नाही.