माऊली ट्रस्ट डॉक्टर दिंडी रविवारी निघणार

आषाढी एकादशीनिमित्त आळंदी ते पंढरपूर आषाढी वारीतील भाविकांना वैद्यकीय सेवासुविधा देण्यासाठी माऊली ट्रस्टची डॉक्टर दिंडी रविवारी मुंबईतून निघणार आहे. माऊली चॅरिटेबल अॅण्ड मेडिकल ट्रस्ट, मुंबई यांच्यावतीने आळंदी ते पंढरपूर आषाढी वारीमध्ये शेकडो तज्ञ डॉक्टर आणि अनुभवी मेडिकल स्टाफ आणि 6 रुग्णवाहिका यांच्या माध्यमातून मोफत वैद्यकीय सेवा देण्यात येणार आहे. दरम्यान, श्री स्वामी समर्थ महाराज यांची एकमेव पादुका दिंडी रथ आणि वारकरी सांप्रदायाकरिता महाप्रसाद सेवा अर्पण केली जाणार आहे.

आळंदी ते पंढरपूर आषाढी वारीकरिता माऊली ट्रस्ट डॉक्टर दिंडीचा प्रस्थान सोहळा रविवार, 15 जूनला सकाळी होणार आहे. सकाळी 8.30 ते 9.30 श्री स्वामी समर्थ महाराज यांच्या पादुकांचे पूजन व अभिषेक होणार आहे. सकाळी 9.30 ते 10.30 श्री स्वामी समर्थ महाराज मठ, शिवाजी पार्क पोलीस ठाण्याजवळून काही अंतरावर श्री विठ्ठल रुक्मिणी मंदिर, हेमाडपंथी कीर्तन संस्थेपर्यंत पायी दिंडी प्रवास करणार आहे. सकाळी 10.30 ते 11.30 हरी माधव वैद्य हॉल, कासारवाडी शेजारी, शिवसेना भवन समोरील कोहिनूर स्क्वेअर मॉलच्या मागील बाजूस या ठिकाणी महाप्रसाद वितरण होणार आहे. त्यानंतर दिंडी श्रीक्षेत्र आळंदीच्या दिशेने प्रस्थान करणार आहे, अशी माहिती माऊली चॅरिटेबल आणि मेडिकल ट्रस्टचे विश्वस्त अरविंद भोसले यांनी दिली.