जग पुन्हा एकदा तिसऱ्या महायुद्धाकडे वाटचाल करत आहे. एकीकडे रशिया-युक्रेनचे युद्ध गेल्या तीन वर्षापासून सुरू असताना आता इस्रायल आणि इराणमध्येही युद्धाचा भडका उडाला आहे. इस्रायलने इराणवर एअरस्ट्राईक केला आहे. इस्रायलच्या सैन्याने इराणची राजधानी तेहरानवर हवाई हल्ले केले आहेत. शेकडो मिसाईल्स, ड्रोनच्या सहाय्याने इस्रायलने इराणच्या सैन्य ठिकाणांवर आणि अणुप्रकल्पांवर हल्ला केला.
इस्रायलने शुक्रवारी पहाटे इराणची राजधानी तेहरानवर हवाई हल्ला केला. इराणच्या अनेक अणुप्रकल्प आणि सैन्य ठिकाणांवर हा हल्ला करण्यात आला आहे. या हल्ल्यानंतर तेहरानमध्ये मोठ्या स्फोटांचे आवाज ऐकू आले. नातांज आणि फोर्दो अणुकेंद्रामध्ये स्फोट झाल्याचे वृत्त असून तेहरानमधील इमाम खुमैनी विमानतळही हवाई हल्ल्याच्या कचाट्यात सापडल्याची माहिती मिळत आहे. संपूर्ण देश साखरझोपेत असताना झालेल्या या हल्ल्यामुळे इराणचे नागरीक हादरून गेले आहेत. या हल्ल्यात इराणच्या चिफ ऑफ स्टाफचा मृत्यू झाल्याचे वृत्त आहे.
दरम्यान, या हल्ल्यानंतर इराणने आपले हवाई क्षेत्र वाहतुकीसाठी बंद केले असून आणीबाणी लागू केली आहे. दुसरीकडे इराणकडून जोरदार प्रत्युत्तर मिळण्याची शक्यता असल्याने इस्रायलनेही खबरदारीचा उपाय म्हणून आणीबाणीची घोषणा केली आहे. इराण कोणत्याही क्षणी हल्ला करू शकतो अशी शक्यता इस्रायलच्या संरक्षण मंत्री इस्राइल काट्स यांनी व्यक्त केली आहे.
…तर पुढची पिढी जग पाहू शकणार नाही
इराणांच्या नातांज येथील मुख्य अणुउर्जा प्रकल्पाला लक्ष्य करण्यात आल्याची माहिती इस्रायलचे पंतप्रधान बेंझामीन नेतन्याही यांनी दिली. इराण 10 हजारांहून अधिक मिसाईल्स तयार करत आहे. हे मिसाईल्स आणि बॉम्ब बनवणाऱ्या ठिकाणांना लक्ष्य करण्यात आले. तसेच बॉम्ब बनवण्याचे काम करणाऱ्या इराणी अणुशास्त्रज्ञांना लक्ष्य करत बॅलेस्टिक मिसाईल तयार करणाऱ्या ठिकाणावर हल्ला करण्यात आला आहे, अशीही माहिती त्यांनी दिली. गरज असेपर्यंत ही कारवाई सुरू राहील. आताच कारवाई केली नाही तर पुढची पिढी जग पाहू शकणार नाही, असेही ते म्हणाले. यावेळी त्यांनी अमेरिकेचे राष्ट्राध्यक्ष डोनाल्ड ट्रम्प यांचेही पाठिंबा दिल्याबद्दल आभार मानले. विशेष म्हणजे डोनाल्ड ट्रम्प यांनी काही तास आधीच इस्रायल इराणवर हल्ला करू शकतो अशी शक्यता वर्तवली होती.
Comment List