महापालिकेच्या मिळकतकर विभागातील गोंधळ काही थांबत नाही. पीटी 3 फॉर्म भरून दिलेल्या मिळकतदारांना अद्यापही चाळीस टक्के सवलत दिली जात नाही. पीटी 3 फॉर्म हा मिळकत करधारकांच्या मुळावर आलेला आहे. पीटी ३ फॉर्मची गरज नसताना, प्रशासनाच्या फायद्यासाठी हा फॉर्म तत्कालीन कर आकारणी आणि कर संकलनप्रमुख यांनी लादला. महापालिकेकडे सर्व रेकॉर्ड अद्ययावत आहे. या फॉर्मची गरज नाही. हा फॉर्म म्हणजे एक कुरण होते व आहे, असा आरोप करून आपली संस्था, आपला परिसर संस्था आणि नागरी हक्क समितीने संताप व्यक्त केला आहे. चुकीच्या पद्धतीने झालेल्या अर्ज नोंदणीचा फटकाही मिळकतदारांना बसत आहे.
महापालिकेच्या मिळकत विभागाशी संबंधित तक्रारींवर आपले पुणे, आपला परिसर, नागरी हक्क संस्था यांच्या वतीने माजी विरोधी पक्षनेते उज्ज्वल केसकर, शिवसेना (उद्धव बाळासाहेब ठाकरे) पक्षाचे महापालिकेतील माजी नगरसेवक प्रशांत बधे, सुहास कुलकर्णी, काका कुलकर्णी यांनी मिळकत कर विभागाची सुत्रे नुकतीच हाती घेतलेले अविनाश सपकाळ यांची भेट घेत मिळकतकराच्या तक्रारींवर चर्चा केली. यावेळी सहायक कर संकलन प्रमुख अस्मिता तांबे प्रशासकीय प्रमुख रवींद्र ढावरे आणि इतर अधिकारी उपस्थित होते.
निवासी मिळकतदार स्वतः राहत असलेल्या मिळकतीच्या करात चाळीस टक्के सवलत देण्यात येत आहे. राज्य सरकारने ही सवलत बंद केली होती. ती पुन्हा गेल्या वर्षी सुरू केली गेली. ही सवलत मिळविण्यासाठी मिळकतदारांना पीटी ३ फॉर्म भरून देणे बंधनकारक केले गेले. तसेच क्षेत्रीय कार्यालय स्तरावरही महापालिकेकडून मिळकतींचे सर्वेक्षण केले गेले होते. यामध्ये साडेतीन लाखांहून अधिक मिळकतींचा समावेश आहे. दरम्यान, ज्या मिळकतदारांचे नाव यादीत आहे, त्यांना ४० टक्के सवलत मिळेल. मात्र, त्यांनी पालिकेच्या विशेष कक्षातून आपले बिल दुरुस्त करून घ्यावे, असे आवाहन कर आकारणी व कर संकलन विभागाचे उपायुक्त अविनाश सपकाळ यांनी म्हटले आहे.
Comment List