मुंबई महानगरपालिकेच्या विविध प्रकल्पांमध्ये बाधित होणाऱ्या प्रकल्पग्रस्तांसाठी पालिका मुलुंडमध्ये 6731 घरे बांधत आहे. या घरांच्या योजनेमुळे रहिवाशांच्या विरोधामुळे रखडलेले पालिकेचे अनेक प्रकल्प मार्गी लावण्यास मोठी मदत होणार आहे. घरांची ही कामे तातडीने पूर्ण करा, असे निर्देश पालिका आयुक्त भूषण गगराणी यांनी संबंधित अधिकाऱ्यांना आज घर बांधणी प्रकल्प पाहणीनंतर दिले.
पालिकेच्या माध्यमातून विकास आराखडा, सर्वसमावेशक वाहतूक योजना-रस्ते, पाणीपुरवठा व मलनिस्सारण प्रकल्प अशा अनेक प्रकल्पांसाठी अनेक वेळा सदर जमीन भारमुक्त करताना प्रकल्पबाधितांना पर्यायी घरे द्यावी लागतात. यामध्ये निवासी जागेसाठी मालमत्ता खात्याकडून तर अनिवासी बांधकामांना बाजार खात्याकडून पर्यायी जागा देण्यात येतात. सद्यस्थितीत पालिकेने हाती घेतलेल्या विविध प्रकल्पात सुमारे 36 हजारांवर घरांची गरज आहे. प्रकल्पबाधितांना पुनर्वसनात ते राहत असलेल्या ठिकाणीच घर मिळावे, अशी मागणी असते. त्यामुळे या उपक्रमात पालिकेच्या सातही झोनमध्ये पाच हजारांवर घरे उपलब्ध होणार असल्यामुळे प्रकल्पबाधितांना ते राहत असलेल्या ठिकाणाजवळच घरे उपलब्ध होणार आहेत. शिवाय प्रदूषणाचे कारण देत माहुलमध्ये जाण्यास होणारा विरोधही टळणार असल्याने पालिकेचे विकास प्रकल्पांच्या अंमलबजावणीस जोर मिळणार आहे.
300 चौरस फुटांचे घर मिळणार
प्रकल्पबाधितांसाठी पालिकेकडून मुलुंड पूर्व येथे ‘बृहन्मुंबई प्रकल्पबाधित गृहनिर्माण प्रकल्प’ अंतर्गत सुमारे 30,954 चौरस मीटर क्षेत्रफळावर 5 इमारती बांधण्यात येत आहेत. यामध्ये तळमजला प्लस 22 मजल्यांच्या 4 इमारती तर तळमजला प्लस 25 मजल्याच्या एका इमारतीचा समावेश आहे. प्रत्येक सदनिकेचे क्षेत्रफळ 300 चौरस फूट असून त्यामध्ये बैठक, शयनकक्ष (संलग्नित पाश्चिमात्य शैलीचे स्वच्छतागृह), स्वयंपाकघर, सामाईक स्वच्छतागृह (कॉमन बाथरूम) यांचा समावेश आहे.
Comment List