जम्मू-काश्मीरमधील कटरा येथील प्रसिद्ध वैष्णोदेवी यात्रेच्या मार्गावर एक मोठा अपघात झाला. कटरा ते माता वैष्णोदेवी भवन या मार्गावर बाणगंगाजवळ अचानक भूस्खलन झाले. या अपघातात चार भाविक जखमी झाले आहेत. माहिती मिळताच प्रशासन आणि एनडीआरएफची टीम घटनास्थळी पोहोचली आणि मदत आणि बचाव कार्य सुरू करण्यात आले आहे. जखमींना त्वरित प्राथमिक उपचार दिल्यानंतर त्यांना कटरा येथील सरकारी रुग्णालयात दाखल करण्यात आले आहे. प्रशासनाने तातडीने रुग्णवाहिका आणि वैद्यकीय पथक घटनास्थळी पाठवले. त्याच वेळी, जम्मू-काश्मीर पोलिस आणि श्राइन बोर्डाचे सैनिक देखील घटनास्थळी मदत कार्यात गुंतले आहेत.
प्राथमिक माहितीनुसार मोठ्या संख्येने भाविक मातेच्या दर्शनासाठी पदपथावरून जात असताना हा अपघात झाला. अचानक मोठाले दगड आणि मातीचा ढिगारा यात्रा मार्गामध्ये आल्यामुळे, चार भाविक या ढिगाऱ्यात अडकले.
कटरा ते वैष्णोदेवी भवन हा मार्ग दररोज हजारो भाविकांच्या ये-जा आणि गर्दीने भरलेला असतो. श्रावण महिना तसेच सोमवार असल्याने यात्रेच्या मार्गावर मोठी गर्दी होती. अशा परिस्थितीत अचानक झालेल्या या भूस्खलनामुळे प्रवाशांमध्ये भीती निर्माण झाली आहे. हवामान खात्याने अलीकडेच जम्मू भागात मुसळधार पावसाचा इशारा दिला होता. सततच्या पावसामुळे डोंगरांची माती सैल झाली होती, त्यामुळे हे भूस्खलन झाले. प्रशासनाने प्रवाशांना सावधगिरी बाळगण्याचे आणि हवामानाची माहिती घेऊनच प्रवास करण्याचे आवाहन केले आहे.
श्राइन बोर्डाचे अधिकारी परिस्थितीवर लक्ष ठेवून आहेत आणि लवकरच रस्ता पुन्हा सुरू करण्याचा प्रयत्न केला जात आहे. परिस्थिती आता नियंत्रणात आहे आणि घाबरून जाण्याची गरज नाही, असे प्रशासनाने सांगितले आहे. प्रवाशांना अफवांकडे लक्ष देऊ नका आणि प्रशासनाच्या मार्गदर्शक सूचनांचे पालन करण्याचे आवाहन करण्यात आले आहे.
Comment List