महाराष्ट्राचा जुगाराचा डाव करून टाकलाय…! जितेंद्र आव्हाड यांचा संताप

कृषीमंत्री माणिकराव कोकाटे हे विधान परिषदेच्या सभागृहात रमी खेळत असल्याचा व्हिडीओ समोर आल्यानंतर त्यांच्यावर मोठ्या प्रमाणात टीका होत आहे. त्यावर बोलताना कोकाटे यांनी ‘ते रमी खेळत नव्हते तर त्यांच्या मोबाईलवर रमीची जाहिरात सुरू होती’, असे स्पष्टीकरण दिले. मात्र हे स्पष्टीकरण कसे साफ खोटे आहे हे दाखवणारे व्हिडीओच राष्ट्रवादी काँग्रेस शरदचंद्र पवार पक्षाचे आमदार जितेंद्र आव्हाड यांनी शेअर केले आहेत. सोबत एक पोस्ट शेअर करत कोकाटेंना फटकारले आहे.

एकीकडे विधिमंडळाचे कामकाज सुरू आहे; प्रश्नौत्तरांचा तास सुरू आहे अन् दुसरीकडे कृषीमंत्री माणिकराव कोकाटे हे जंगली रमी खेळत होते. त्याचा व्हिडिओ प्रसारित झाल्यानंतर, माणिकराव कोकाटे यांच्या पहिल्या व्हिडिओत ते जंगली रमी खेळतच नव्हते जाहिरात बघत होते असे सांगण्यात येत होते.
आता मी… pic.twitter.com/paHlQjGWP2

— Dr.Jitendra Awhad (@Awhadspeaks) July 21, 2025

”एकीकडे विधिमंडळाचे कामकाज सुरू आहे; प्रश्नोत्तरांचा तास सुरू आहे अन् दुसरीकडे कृषीमंत्री माणिकराव कोकाटे हे जंगली रमी खेळत होते. त्याचा व्हिडिओ प्रसारित झाल्यानंतर, माणिकराव कोकाटे यांच्या पहिल्या व्हिडिओत ते जंगली रमी खेळतच नव्हते जाहिरात बघत होते असे सांगण्यात येत होते. आता मी दोन व्हिडिओ देतोय. दोन्ही व्हिडिओ व्यवस्थित बघा… कुठला पत्ता कुठे आणि कसा हलवला आहे, हे दिसेल. माणिकराव कोकाटे हेच ऑनलाईन जुगाराचे पत्ते आपल्या बोटाने सरकवत आहेत. आणखी किती पुरावे हवेत ते सांगा; मागाल तेवढे पुरावे देतो. महाराष्ट्राचाच जुगाराचा डाव करून टाकलाय…!”, अशा शब्दात जितेंद्र आव्हाड यांनी कोकाटेंवर निशाणा साधला.