शेतातील बांध खोदल्याच्या रागातून चुलत भावानेच चुलत भावाची दगडाने ठेचून हत्या केल्याची घटना जालन्यात घडली. याप्रकरणी बापलेकाला पोलिसांनी अटक केली आहे. किरण तनपुरे असे मयत तरुणाचे नाव आहे. तर परमेश्वर गुलाबराव तनपुरे आणि किशोर परमेश्वर तनपुरे अशी अटक केलेल्या आरोपींची नावे आहे.
तालुक्यातील वाढोणा शिवारात रविवारी सांयकाळी 6 वाजण्याच्या सुमारास शेत गट क्रमांक 119 मध्ये तक्रारदार गणेश तुळशीदास तनपुरे (60) आणि त्याचा मयत मुलगा किरण तनपुरे (24) काम करीत होते. यावेळी गणेश यांचा चुलत भाऊ
परमेश्वर गुलाबराव तनपुरे आणि त्याचा मुलगा किशोर परमेश्वर तनपुरे तेथे आले.
शेतातील सामाईक बांधावरुन पावसाचे पाणी जाण्यासाठी तक्रारदार गणेश तनपुरे यांच्या बाजूने चारी खोदली होती. याबाबत गणेश तनपुरे यांनी आरोपींना विचारणा केली असता आरोपीने शिवीगाळ करुन तक्रारदार यांना मारहाण करुन खाली पाडले. वडिलांना मारहाण होत असल्याची पाहून मयत किरण तनपुरे हा मध्यस्थीसाठी आला.
किरणने आपल्या वडिलांना मारहाण केल्याबाबत जाब विचारताच आरोपीने बांधावरील दगडाने किरण तनपुरेच्या डोक्यावर, चेहर्‍यावर जबर मारहाण करुन त्यास जागीच ठार केले. यानंतर दोघे बापलेक घटनास्थळावरुन पसार झाले. याप्रकरणी परतूर पोलीस ठाण्यात सोमवारी सकाळी गणेश तनपुरे यांच्या तक्रारीवरुन हत्येचा गुन्हा दाखल करण्यात आला. पोलिसांनी तात्काळ शोधमोहिम राबवत दोन तासात आरोपींच्या मुसक्या आवळल्या.
Comment List