>> मनीष म्हात्रे
नालासोपारा शहर आता एमडी, ब्राऊन शुगर, गांजा सप्लायचा अड्डा झाला असून शहराची वाटचाल नशेचा ‘उडता पंजाब’च्या मार्गाने सुरू झाल्याचे चित्र निर्माण झाले आहे. मेफेड्रिन ड्रग्ज कारखान्यावर छापा टाकून दोन दिवस उलटले नाही तोच नालासोपाला आणि तुळींज पोलिसांनी वेगवेगळ्या ठिकाणी कारवाई करून 1 कोटी 66 लाखांचे अमली पदार्थ जप्त केले. अमली पदार्थांचा गोरखधंदा चालवणाऱ्या अबेके व्हिक्ट्री, शिवा स्वामी, झाकीर अन्सारी यांच्या पोलिसांनी मुसक्या आवळल्या.
नालासोपाऱ्यात नायजेरियन महिलेच्या ताब्यातून साडेपाच कोटींचे एमडी जप्त करण्यात आले होते. ही कारवाई चर्चेत असताना पोलिसांनी तीन ठिकाणी कारवाई असून करोडोंचा मुद्देमाल हस्तगत केला. तुळींज पोलिसांनी यशवंत हाईटजवळील भाजी मार्केट रोडवर संशयास्पद फिरणाऱ्या अबेके व्हिक्ट्री या नायजेरियन महिलेला ताब्यात घेतले. तिची झडती घेतली असता पोलिसांना 1 कोटी 60 लाखांचे एमडी हा अमली पदार्थ आढळला. तर दुसऱ्या घटनेत पाणी विक्रेत्याकडून साडेसहा लाखांचे ब्राऊन शुगर जप्त करण्यात आहे.
पाणी विक्रीचा व्यवसाय करणारा तरुण अमली पदार्थाची विक्री करत असल्याची माहिती नालासोपारा पोलिसांना मिळाली. पोलिसांनी सापळा रचून शिवा स्वामी याला ताब्यात घेतले. त्याच्याकडून पोलिसांनी 6 लाख 32 हजारांची ब्राऊन शुगर जप्त केली. जामा मस्जिद येथील करारी मिल कंपाऊंडजवळ गांजा विक्रीसाठी आलेल्या झाकीर अन्सारीला नालासोपारा पोलिसांनी बेड्या ठोकल्या असून त्याच्याकडून 32 हजारांचा गांजा जप्त केला.
नायजेरियनची वस्ती
नालासोपारा प्रगतीनगर परिसरात नायजेरियन लोक अनधिकृतपणे बार चालवत असल्याचे पोलिसांच्या कारवाईत समोर आले आहे. शहरातील आचोळे अलकापुरी, मोरेगाव, ओस्तवाल नगर, गाव, प्रगतीनगर, रेहमतनगर तर पश्चिमेकडील हनुमाननगर या परिसरात मोठ्या प्रमाणात नायजेरियनची वस्ती आढळते. तर तुळींज आणि नालासोपारा पोलीस ठाण्यात बोटावर मोजण्याइतक्याच नायजेरियची नोंद आहे.
Comment List