ऑपरेशन सिंदूर आणि ऑपरेशन महादेव हे मते मिळवण्यासाठी केले काय, सैनिकांच्या अभियानाचे राजकारण करणाऱ्या भाजपने आपल्या विचारांची खालची पातळी दाखवून दिली आहे, अशा शब्दांत शिवसेना (उद्धव बाळासाहेब ठाकरे) नेते, खासदार संजय राऊत यांनी भाजपवर हल्ला चढवला आहे. तसेच टेटर आणि क्रिकेट एकत्र येणे, हे भाजपला चालते का, असा परखड सवालही त्यांनी केला आहे.
उरी, पठाणकोट, पुलवामा आणि पहलगाम हल्ल्यात अनेक निरपराधांचे बळी गेले आहेत. हा अपराध सरकारने केला आहे. या सरकारने आपल्या सैनिकांच्या कारवाईचे, अभियानाचे आणि शौर्याचे राजकारण केले आहे. त्यामुळे केंद्रीय गृहमंत्र्यांवर कोर्ट मार्शलची कारवाईच झाली पाहिजे, असे संजय राऊत म्हणाले. सरकार ऑपरेशन सिंदूर, ऑपरेशन महादेव, ऑपरेशन गंगा, ऑपरेशन यमुना हेच करणार आहे काय? सरकारने ऑपरेशन ब्लू स्टार, ऑपरेशन पोलो, ऑपरेशन पराक्रम, ऑपरेशन विजय यांची आठवण ठेवावी, असेही त्यांनी ठणकावले.
सैनिकांच्या कारवाईत जाती- धर्म नसतो. मात्र, आता भाजप सैनिकांच्या शौर्याचेही राजकारण करत आहे. या अभियानात हिंदुत्व आणत आहेत. यात कोठेही धर्म येत नाही. ऑपरेशन ब्लू स्टार, ऑपरेशन पोलो, ऑपरेशन पराक्रम, ऑपरेशन विजय या नावांचा भाजपला द्वेष आहे काय, असा सवालही त्यांनी केला. यातून त्यांची विचारांची खालची पातळी दिसून येत आहे. सैन्य दलाच्या पराक्रमातही ते राजकारण करत जात-धर्म आणत आहेत. ऑपरेशन सिंदूर, ऑपरेशन महादेव हे सर्व भाजप मतांसाठी करत असल्याचा आरोपही त्यांनी केला.
Comment List