दुबईहून मुंबईला येणाऱ्या स्पाइसजेट एअरलाइन्सच्या विमानात धक्कादायक घटना समोर आली आहे. विमान मिडएअर असताना एक प्रवासी ई-सिगारेट ओढत होता. क्रू मेंबर्सच्या ही बाब लक्षात आल्यानंतर त्यांनी प्रवाशाकडून ई-सिगारेट जप्त केली. यानंतर विमानतळ अधिकाऱ्यांना याबाबत माहिती देण्यात आली. याप्रकरणी सहार पोलीस ठाण्यात प्रवाशाविरोधात गुन्हा दाखल केला आहे. मुर्तजा रली खान असे आरोपीचे नाव आहे.
मिळालेल्या माहितीनुसार, दुबईहून मुंबईला येणारे स्पाइसजेट विमान क्रमांक SG-60 हे मिड एअर असताना एका प्रवाशाने शौचालयात बसून सिगारेट ओढण्यास सुरुवात केली. केबिन क्रू सदस्य महेश यांना शौचालयातून सिगारेटचा वास आला. त्यांनी याबाबात चौकशी केली असता सीट 1 के वर बसलेल्या मुर्तजा खान या प्रवासाने शौचालयात ई-सिगारेट ओढल्याचे समोर आले.
महेशने मुर्तजा खानकडे विचारपूस केली असता त्याने ई-सिगारेट ओढल्याचे कबूल केले आणि हिरवी ई-सिगारेट दाखवली. क्रू मेंबरने ती सिगारेट जप्त केली. महेशने पायलटला घटनेची माहिती दिली. मग पायलटने विमानतळ अधिकाऱ्यांना याबद्दल माहिती दिली.
स्पाईसजेट एअरलाइन्सचे ड्युटी मॅनेजर चंद्रकांत सोनवणे यांनी मुर्तजा खानविरुद्ध तक्रार दाखल केली आहे. सहार पोलिस ठाण्यात मुर्तजा खानविरुद्ध बीएनएसच्या कलम 125 आणि विमान नियम 1937 च्या कलम 25 अंतर्गत गुन्हा दाखल करण्यात आला आहे. खानला पोलिसांसमोर हजर राहण्याची नोटीस बजावण्यात आली आहे.
Comment List