गुजरातमधील दाहोद मतदारसंघात येणाऱ्या महिसागर जिल्ह्यामध्ये भारतीय जनता पक्षाच्या मुलाने ईव्हीएम मशीन ताब्यात घेतल्यानंतर आता मध्य प्रदेशमध्येही याहून धक्कादायक प्रकार घडला आहे. लोकसभा निवडणुकीच्या तिसऱ्या टप्प्यासाठी 7 मे रोजी मतदान पार पडले. मध्य प्रदेशमधील भोपाळ लोकसभेसाठीही याच दिवशी मतदान झाले. यादरम्यान एका अल्पवयीन मुलाने मतदान केल्याचे समोर आले आहे. याचा व्हिडीओही व्हायरल झाला आहे.
व्हिडीओत दिसणारा मुलगा दुसरा तिसरा कोणी नसून भाजप नेते आणि जिल्हा पंचायत सदस्य विनय मेहर यांचा मुलगा असल्याचा आरोप काँग्रेसने केला आहे. विशेष म्हणजे मतदानाचा हा व्हिडीओ मेहर यांनी स्वत:च फेसबुकवर शेअर केला होता, मात्र प्रकरण शेकणार असे दिसताच त्यांनी हा व्हिडीओ डिलीट केला. मात्र तोपर्यंत हा व्हिडीओ चांगलाच व्हायरल झाला आणि काँग्रेसने भाजपला घेरले आहे.
काँग्रेसने हा व्हिडीओ सोशल मीडियावर शेअर केले असून भाजपसह निवडणूक आयोगावरही निशाणा साधला आहे. काँग्रेस नेते पियूष बबेले यांनी एक्स (ट्विटर) अकाऊंटवर हा व्हिडीओ शेअर करत म्हटले की, भाजपने निवडणूक आयोगाला लहान मुलांचे खेळणे बनवले असून भोपाळमध्ये भाजपचे जिल्हा पंचायत सदस्य विनय मेहर यांनी त्यांच्या अल्पवयीन मुलाला मतदान करायला लावले. मेहर यांनी याचा व्हिडीओही बनवला आहे. त्यांनी हा व्हिडीओ आपल्या फेसवुकवर शेअर केला आहे. यावर कारवाईचा बडगा उचलला जाईल का? असा सवाल काँग्रेस नेत्याने केला आहे.
…तर कारवाई होणार
या तक्रारीची निवडणूक आयोगाने दखल घेतली असून भोपाळचे जिल्हाधिकारी कौशलेंद्र विक्रम सिंह यांनी बैरसियाच्या एसडीएमला सदर व्हिडीओच्या चौकशीचे आदेश दिले आहेत. यात दोषी आढळल्यास भाजप नेत्यावर कारवाई होण्याची शक्यता आहे.
मुलगा हट्ट करत होता!
दरम्यान, सदर प्रकारावर भाजप नेते विनय मेहर यांनी स्पष्टीकरण दिले आहे. मुलगा हट्ट करत होता म्हणून त्याला मतदान केंद्रावर घेऊन गेलो. चुकून व्हिडीओ शूट करून तो फेसबुकवर अपलोड झाला. यामागे माझा काही चुकीचा उद्देश नव्हता, असे मेहर यांनी म्हटले.
दीपिका गरोदर नाही म्हणणारे कुठे गेले? बेबी बंप पाहून चाहत्यांचा टीकाकारांना टोमणा 
Comment List