आपची दिल्लीतील भाजपच्या मुख्यालयावर धडक; पोलिसांकडून कार्यकर्त्यांची धरपकड

स्वाती मालीवाल यांना झालेल्या कथित मारहाण प्रकरणात मुख्यमंत्री अरविंद केजरीवाल यांचे स्वीय सहाय्यक विभव कुमार यांना अटक करण्यात आल्यानंतर ‘आप’चे नेते आणि कार्यकर्त्यांनी मोदी सरकारच्या दडपशाहीविरोधात आज भाजपाच्या दिल्लीतील मुख्यालयावर धडक दिली. अरविंद केजरीवाल यांच्या नेतृत्वाखाली भव्य मोर्चा काढण्यात आला. दुपारी 12 वाजण्याच्या सुमारास ‘आप’चे नेते आणि कार्यकर्ते ‘आप’च्या कार्यालयात पोहोचले आणि अर्ध्या तासानंतर 800 मीटरवर असलेल्या भाजपा मुख्यालयाच्या दिशेने कूच केले.

मोदी सरकारच्या हुकूमशाही आणि दडपशाहीविरोधात यावेळी जोरदार घोषणाबाजी करण्यात आली. यावेळी पोलिसांनी आंदोलन दडपण्याचा प्रयत्न केला तसेच नेते आणि काही कार्यकर्त्यांना ताब्यात घेतले. काही काळ तुरुंगात ठेवल्यानंतर त्यांना सोडण्यात आले. ईडी, सीबीआय आणि आयटीच्या आडून विरोधी पक्षातील नेत्यांवर खोटय़ा आरोपांच्या माध्यमातून तुरुंगात डांबणाऱया मोदी सरकारला केजरीवाल यांनी मोर्चा काढून थेट आव्हान दिले. कितीही दडपशाही करण्याचा प्रयत्न केला तरी आंदोलन आणखी उफाळून येईल, असा इशारा केजरीवाल यांनी दिला होता. त्यामुळे दिल्लीतील भाजप मुख्यालय परिसरात कडक पोलीस बंदोबस्त ठेवण्यात आला होता. परिसराला अक्षरशः छावणीचे स्वरूप आले होते.

144 कलम लागू
केजरीवाल यांच्या आंदोलनाला मोठा प्रतिसाद मिळू नये यासाठी पोलिसांना आधीच कडक पोलीस बंदोबस्त ठेवण्याचे आदेश मोदी सरकारने दिले होते. त्यामुळे भाजपा मुख्यालयाबाहेर 144 कलम लागू करण्यात आले होते. येथून येण्या-जाण्याच्या रस्त्यावर बॅरिकेड्स लावून ते बंद करण्यात आले होते. त्यामुळे दिल्लीकरांची प्रचंड गैरसोय झाली.

भाजपाला विरोधकांना संपवायचे आहे – केजरीवाल
भाजपाने विरोधी पक्षांना संपवण्याचे तीन प्लॅन तयार केल्याचा आरोप अरविंद केजरीवाल यांनी केला. सर्वात आधी निवडणुकीनंतर विरोधी पक्षांची बँक खाती गोठवण्यात येतील. त्यानंतर पक्षाच्या मोठय़ा नेत्यांना अटक करण्यात येईल आणि मग पक्षाचे कार्यालय रिकामे करण्यात येईल, असे ते म्हणाले.