सांताक्रुझ येथील 75 वर्षीय आजोबांच्या झोपडय़ातून त्यांच्या तीनही मुलांनी बाहेर पडावे, असे आदेश उच्च न्यायालयाने दिले आहेत. दोन मुलांनी घर रिकामे केले असून एक मुलगा झोपडय़ातून बाहेर पडत नव्हता. न्यायालयाच्या आदेशामुळे त्यालाही घराबाहेर पडावे लागेल. घर रिकामे करण्यासाठी न्यायालयाने आठ आठवड्यांची मुदत दिली आहे.
गोविंद बावकर असे या ज्येष्ठ नागरिकाचे नाव आहे. त्यांना दोन मुले व एक मुलगी आहे. मुलीचा विवाह झाला आहे. तिला एक मुलगा आहे. या सर्वांना घरातून बाहेर काढण्यासाठी बावकर यांनी ज्येष्ठ नागरिक प्राधिकरणाकडे अर्ज केला. हा अर्ज प्रलंबित असताना मुलगी घरातून बाहेर पडली. एक मुलगा स्वतंत्र राहत होता. दुसरा मुलगा घर रिकामी करत नव्हता.
हे प्रकरण दिवाणी वादाचे आहे, असे स्पष्ट करत प्राधिकरणाने ज्येष्ठ नागरिकाचा अर्ज फेटाळून लावला. त्याविरोधात बावकर यांनी उच्च न्यायालयात याचिका दाखल केली. न्या. गौरी गोडसे यांच्या एकल पीठाने याचिका मंजूर केली.
काय आहे प्रकरण
बावकर हे महापालिकेचे निवृत्त कर्मचारी आहेत. मुलगी व तिचे कुटुंब, अन्य दोन मुलांचे कुटुंब एकत्रितपणे सांताक्रुझ येथील झोपडय़ात राहत होते. बावकर यांचे सुनेसोबत अनैतिक संबंध आहेत, असा आरोप करण्यात आला. याचा त्यांना मानसिक त्रास झाला. त्यांनी एकटे राहण्याचा निर्णय घेतला. यासाठी त्यांची न्यायालयीन लढाई सुरू होती.
मुलाचा दावा
मी माझ्या कुटुंबासोबत मूळ घरात राहतो तर वडील वरच्या मजल्यावर राहतात. माझा त्यांना काहीच त्रास नाही. ज्येष्ठ नागरिक कायद्याचा गैरफायदा घेऊन ते मला घरातून बाहेर काढत आहेत. वडिलांचा अर्ज फेटाळण्याचा प्राधिकरणाचा निर्णय योग्यच आहे, असा दावा मुलाने केला होता. न्यायालयाने तो मान्य केला नाही.
– बावकर यांचे हित जपण्यात प्राधिकरण अपयशी ठरले आहे. झोपडे ज्येष्ठ नागरिकाचे आहे यात काहीही दुमत नाही. मुलाला घराबाहेर काढले तर त्याचे नुकसान होणार नाही, असे निरीक्षण न्यायालायने नोंदवले.
.jpeg)
.jpeg)
Comment List