ठाणे पालिकेचे आवाहन झुगारले, दिव्यात बेकायदा शाळांविरोधात उद्यापासून अधिकृत शाळांचा बंद

पालिकेने केलेले आवाहन झुगारून बेकायदा शाळांविरोधात दंड थोपटत दिव्यातील अधिकृत शाळांनी मंगळवारपासून ‘बेमुदत बंद’ची हाक दिली आहे. वारंवार अर्ज-विनंत्या-आंदोलने करूनही अनधिकृत शाळांवर कोणतीही ठोस कारवाई होत नसल्याने 19 अधिकृत शाळांनी ‘बंद’चे हत्यार उपसले आहे. पालिकेच्या प्रशासनाने कितीही दबाव आणण्याचा प्रयत्न केला तरी 1 जुलैपासून बंद पुकारणारच, असा निर्धार इंडिपेंडेंट स्कूल संघटनेच्या पदाधिकाऱ्यांनी केला आहे.

ठाणे महापालिका दरवर्षी बेकायदा शाळांची यादी जाहीर करते. मात्र या शाळांची संख्या कमी होण्याऐवजी वाढतच चालली आहे. 2023 मध्ये या जिल्ह्यातील बेकायदा शाळांची संख्या 45 इतकी होती. ती आता 81 वर येऊन पोहोचली आहे. धक्कादायक म्हणजे या 81 शाळांपैकी 69 शाळा या फक्त दिव्यात आहेत. या बेकायदा शाळांविरोधात अधिकृत शाळा संचाल कांनी याआधीही दोनवेळा आंदोलनाचा इशारा महापालिकेच्या शिक्षण विभागाला दिला होता.

महापालिकेच्या वतीने या अनधिकृत शाळांवर कठोर कारवाई करण्याचे आश्वासन दिले होते. मात्र अद्याप या शाळांवर कोणतीही कारवाई झालेली नाही. महापालिका खोटी आश्वासन देऊन फसवणूक करत असल्याचा दावा अधिकृत शाळा संचालकांनी केला आहे.

महापालिकेच्या या फसव्या आश्वासनांना बळी न पडत बेमुदत बंद अंदोलन सुरू राहणार म्हणचे राहणारच, असा पवित्रा अधिकृत शाळा संचालकांनी इंडिपेंडेंट स्कूल संघटनेच्या वतीने हाती घेतला आहे.

प्रशासनाने वाचला कारवाईचा पाढा

शिक्षणाधिकारी कमलाकांत म्हेत्रे यांनी इंडिपेंडेंट स्कूल संघटनेसोबत पत्रव्यवहार करून विद्यार्थ्यांच्या हितासाठी आंदोलन मागे घेण्याचे आवाहन केले आहे. या बेकायदा शाळा बंद करण्यासाठी महापालिकेमार्फत जनजागृती केली जात आहे. तसेच या शाळांवर कारवाईचा बडगा उगारत 32 शाळांचे पाणीपुरवठा बंद केला आहे. तसेच सर्व शाळांना करणे दाखवा नोटिसा बजावत कायदेशीर तरतुदीनुसार दंड आकारणी केली आहे. तसेच या शाळांवर कायदेशीर कारवाई करण्यासाठी प्रशासन कसोशीने पाठपुरावा करत असल्याचे सांगत हे आंदोलन मागे घेण्याचे आवाहन महापालिकेने इंडिपेंडेंट स्कूल संघटनेला केले आहे.