मुंबईत आणखी एक भूमिगत मेट्रो, आणिक आगार ते गेट वे ऑफ इंडिया दरम्यान धावणार; सरकारला प्रस्ताव सादर

मुंबई मेट्रो अ‍ॅक्वा लाईन 3 चे संपूर्ण 33.5 किमी अंतर सुरू होण्याची अंतिम तारीख जवळ येत आहे. असे असतानाच मुंबई मेट्रो रेल कॉर्पोरेशन लिमिटेडने मुंबईतील आणखी एका भूमिगत मेट्रोसाठी प्रक्रिया सुरू केली आहे. MMRCL ने लाईन 11 साठीचा प्रस्ताव महाराष्ट्र सरकारकडे मंजुरीसाठी सादर केला आहे.

हिंदुस्तान टाईम्सने याबाबत वृत्त दिले आहे. या मेट्रोची आखणी आणि बांधकामाची जबाबदारी MMRCL कडे आहे. या मार्गाची एकूण लांबी 17.5 किमी असून ती अणिक डेपोपासून गेटवे ऑफ इंडियापर्यंत असणार आहे. या मार्गात नागपाडा, भेंडी बाजार यांसारख्या दाट लोकवस्तीच्या भागांमधून ही मेट्रो जाईल. अणिक डेपो हे एकमेव स्थानक जमिनीवर असेल तर उर्वरित सर्व स्थानकं भूमिगत असणार आहेत.

MMRCL च्या अधिकाऱ्यांनी दिलेल्या माहितीनुसार, या प्रस्तावाची प्राथमिक मंजुरी राज्य सरकारकडून घेतली जाईल आणि त्यानंतर केंद्र सरकारकडे पाठवला जाईल. यासाठी प्रथम सविस्तर अहवाल तयार केला जातो. राज्य सरकारच्या नगरविकास विभागाकडून मंजुरी मिळाल्यानंतर हा अहवाल केंद्र सरकारच्या नगरविकास मंत्रालयाकडे जाईल.

या प्रकल्पासाठी देशांतर्गत किंवा आंतरराष्ट्रीय वित्तीय संस्थांकडून निधी मिळाल्यानंतर पर्यावरणासह इतर कायदेशीर परवानग्या घेण्याची प्रक्रिया सुरू केली जाईल. त्यानंतर निविदा पद्धतीने इन्फ्रास्ट्रक्चर कंपन्या नियुक्त केल्या जाईल.

सुरुवातीला मेट्रोत सहा डबे असतील. अणिक आगार ते प्रतीक्षा नगर बेस्ट बस डेपो येथे 16 हेक्टर जागेत या मेट्रोसाठी डेपो उभारण्यात येईल. हा डेपो बेस्टच्या बस सेवेशी जोडला जाईल, जेणेकरून संयुक्त वाहतूक सुविधा उपलब्ध होईल. लाईन 11 ही लाईन 4 (वडाळा – घाटकोपर – ठाणे – कासारवडवली), अ‍ॅक्वा लाईन, मोनोरेल आणि भायखळा व सीएसएमटीसारख्या उपनगरीय रेल्वे स्थानकांशी जोडली जाईल.

MMRCL च्या अंदाजानुसार, 2031 मध्ये या लाईनचा वापर करणाऱ्या प्रवाशांची संख्या सुमारे 5.8 लाख असेल आणि 2041 मध्ये ही संख्या 8.69 लाखांपर्यंत पोहोचेल. टेंडर प्रक्रिया, काम सुरू होण्याची व पूर्ण होण्याची तारीख ही राज्य व केंद्र सरकारच्या मंजुरीनंतरच निश्चित केली जाईल.