हातखंबा येथे गॅस टँकर पलटी होऊन वायुगळती, मुंबई-गोवा महामार्ग 14 तास ठप्प

मुंबई-गोवा महामार्गावर हातखंबा गावाजवळ काल रात्री बारा वाजण्याच्या सुमारास एलपीजी गॅस टँकर पलटी झाला. या अपघातानंतर टँकरमधून वायुगळती होऊ लागल्याने महामार्गावरील वाहतूक तत्काळ बंद करण्यात आली. प्रशासनाने तातडीच्या हालचाली करत परिसरातील ग्रामस्थांना सुरक्षितस्थळी हलविण्यात आले.

जयगडवरून गोव्याकडे जाणाऱया एलपीजी गॅस टँकरला हातखंबा येथे अपघात झाला. अपघातानंतर जिल्हाधिकारी एम. देवेंदर सिंग, जिल्हा पोलीस अधीक्षक नितीन बगाटे आणि प्रशासनातील प्रमुख अधिकाऱयांनी घटनास्थळी धाव घेतली. टँकरमधून वायुगळती होत असल्याने परिसरात भीतीचे वातावरण पसरले. त्यामुळे प्रशासनाने तातडीने कार्यवाही करत हातखंबा गावाजवळील रहिवाशांना सुरक्षित ठिकाणी हलवले.

अपघातस्थळी गॅस टँकरमधील वायू रिकामा करण्यासाठी रेस्क्यू व्हॅन आणि दुसरा टँकर मागवण्यात आला. दुपारी साडेबारा वाजता अपघातग्रस्त टँकरमधील वायू दुसऱया टँकरमध्ये भरण्यात आला. त्यानंतर सुरक्षेची खात्री करून दुपारी 2 वा 10 मिनिटांनी महामार्गावरील वाहतूक सुरू करण्यात आली.

या घटनेमुळे मुंबई-गोवा महामार्गावरील वाहतूक पूर्णपणे विस्कळीत झाली होती. सुरक्षेचा उपाय म्हणून अवजड वाहनांची वाहतूक पूर्णपणे थांबवण्यात आली होती. त्यामुळे अवजड वाहनांच्या रांगा लागल्या होत्या. हलक्या वाहनांना वळके ते बावनदी या पर्यायी मार्गाने वळवण्यात आले आहे. दुपारी 2 वाजून 10 मिनिटांनी मुंबई-गोवा महामार्गावरील 14 तास ठप्प असलेली वाहतूक पूर्ववत करण्यात आली.