नोटबंदी आणि कोरोना काळापासून डिजिटल पेमेंटमध्ये मोठ्या प्रमाणावर वाढ झाली. आता तर डिजिटल अरेस्टचा धाक दाखवून हे भामटे सर्रास लूट करीत आहेत. शस्त्राच्या धाकाने रक्कम ऑनलाइन वर्ग करून घेण्याचा, तर फोन पेद्वारे खंडणी उकळण्याच्या घटना वाढत आहेत. आंबेगाव बुद्रूकमधील सिंहगड कॅम्पस परिसरात २७ मे रोजी भरदिवसा पाचजणांच्या टोळक्याने तरुणाला बेदम मारहाण करीत त्यांच्याकडील फोनद्वारे ८५ हजार रुपये ऑनलाइन वर्ग करून घेतले.
प्रियंका अनिल शेळके (वय ३१, रा. वाघपूर, तासगाव, सांगली), हरीराम कदम, सयाजी पाटील, विशाल जाधव, संदीप रासकर अशी गुन्हा दाखल झालेल्यांची नावे आहेत. याप्रकरणी सुधीर अर्जुन पाटील (वय ३४, रा. आंबेगाव बुद्रुक) यांनी फिर्याद दाखल केली आहे. यापूर्वीही अपहरण करून शस्त्राच्या धाकाने ऑनलाइन रक्कम वर्ग करून घेण्याच्या घटना घडल्या आहेत. तर फोन पेवरही खंडणी उकळल्याच्या घटना वाढत आहेत.
अगदी वाड्या-वस्त्यांवरही स्मार्टफोनचा वापर वाढला आहे. ऑनलाइन गैरप्रकारांमध्ये डिजिटल अरेस्ट हा प्रकार सध्या वाढत आहे. पोलीस किंवा गुप्तहेर संस्थेचे प्रतिनिधी आहेत अशी बतावणी करून सायबर चोर नागरिकाला कॉल करतात आणि त्यांच्याविरोधात न्यायालयात प्रकरण गेल्याचे सांगतात. या केससाठी ते पैशांची मागणी करतात. सायबर चोरांच्या तावडीत सापडलेल्यांना कायद्याचे उल्लंघन केल्याची धमकी देऊन पैसे उकळले जातात.
फसवणुकीसाठी सायबर चोरटे वेगवेगळे फंडे वापरत आहेत. आता मोबाईल सिम बंद होणार आहे, केवायसी करण्याच्या बतावणीने नागरिकांची फसवणूक केली जात आहे. त्यामुळे मोबाईल सिमबाबत आलेल्या मेसेजला प्रतिसाद देऊ नका. पुणे जिल्ह्यात सायबर क्राईमच्या क्रेडिट, डेबिट कार्ड, एटीएम फ्रॉड या गुन्ह्याचा आलेख सातत्याने उंचावत आहे. कर्ज, ऑनलाइन खरेदी-विक्री, इन्शुरन्स, मनी ट्रान्स्फरबरोबरच फेक प्रोफाईल, फेसबुक हॅकिंग, बदनामीकारक मजकूर लिहिणे, अश्लील व्हिडीओ अपलोड करणे, फेक मेल तयार करून समाजात तेढ निर्माण होईल, असे लिखाण ट्विट करणे आदी गुन्ह्याचे प्रमाण दिवसेंदिवस वाढत आहे.
ट्रकचालकाकडून फोन पेवर खंडणी उकळली
खंडणीसाठी आता गुन्हेगारांनी नवीनच फंडा अमलात आणला आहे. एका ट्रकचालकाकडून माथाडी कामगार असल्याचे सांगत चक्क ‘फोन पे’वर ८०० रुपये खंडणी वसूल केल्याची खळबळजनक घटना रांजणगाव औद्योगिक वसाहतीत ऑक्टोबर २०२३ मध्ये घडली होती.
Comment List