वर्षानुवर्षे मोडकळीस आलेल्या उपकरप्राप्त इमारतींचे स्ट्रक्चरल ऑडिट करण्याची प्रक्रिया म्हाडाकडून सुरू असून वर्षभरात 13 हजार 91 इमारतींचे ऑडिट करण्याचे प्राधिकरणाचे लक्ष्य आहे. या कामाला आणखी गती देण्यासाठी म्हाडा आता टेंडर काढून झोननुसार कंपन्यांची नियुक्ती करणार आहे.
मुंबईत सध्या 13 हजारहून अधिक उपकरप्राप्त इमारती असून त्या 80 ते 100 वर्षे जुन्या आहेत. या इमारतींची देखभाल आणि दुरूस्ती म्हाडाच्या मुंबई इमारत दुरुस्ती व पुनर्रचना मंडळाकडून केली जाते. यातील काही इमारती दुरुस्तीच्या पलीकडे गेल्या आहेत. अतिधोकादायक इमारतींची तातडीने दुरुस्ती किंवा पुनर्विकास केल्यास इमारत कोसळण्याच्या घटना कमी होऊन जीवित व वित्तहानी रोखता येणे शक्य होईल. ही बाब लक्षात घेऊन म्हाडाचे उपाध्यक्ष संजीव जयस्वाल यांनी वर्षभरात सर्व उपकरप्राप्त इमारतींचे स्ट्रक्चरल ऑडिट पूर्ण करण्याचे निर्देश फेब्रुवारीत दिले आहेत.
118 इमारती अतिधोकादायक
म्हाडाने आतापर्यंत 600 हून अधिक इमारतींचे स्ट्रक्चरल ऑडिट केले असून त्यापैकी 118 इमारती सी-1 म्हणजे अतिधोकादायक असल्याचे आढळले आहे. तसेच ज्या इमारतींना दुरुस्तीची आवश्यकता आहे त्यासाठी लवकरच म्हाडातर्फे टेंडर काढण्यात येणार आहे.
142 ऑडिटरवर जबाबदारी
म्हाडाच्या उपकरप्राप्त इमारतींचे स्ट्रक्चरल ऑडिट यापूर्वी पालिकेकडून करण्यात येत होते. यंदाच्या वर्षीपासून म्हाडाच्या पॅनलकडून स्ट्रक्चरल ऑडिट करण्यात येत आहे. यासाठी म्हाडाकडे आता 142 ऑडिटर असून यात नव्याने नियुक्ती केलेल्या 26 ऑडिटरचा समावेश आहे. स्ट्रक्चरल ऑडिटला आणखी गती मिळावी यासाठी आम्ही आता टेंडर काढून झोननुसार कंपन्यांची नियुक्ती करणार आहोत, असे अधिकाऱ्याने सांगितले.
Comment List