पंजाब पोलिसांनी बुधवारी रूपनगर जिल्ह्यातील महलां गावातील रहिवासी आणि यूट्यूबर जसबीर सिंग याला पाकिस्तानसाठी हेरगिरी केल्याच्या आरोपाखाली अटक केली. जसबीर सिंग याचे ‘जान महल’ नावाचे यूट्यूब चॅनल असून याचे 11 लाखांहून अधिक सब्स्क्रायबर्स आहेत. पंजाब पोलिसांच्या स्टेट स्पेशल ऑपरेशन सेल (SSOC) मोहाली यांनी ही कारवाई केली आहे.
पंजाबचे डीजीपी गौरव यादव यांनी सांगितले की, जसबीर सिंग हा पाकिस्तानच्या गुप्तचर यंत्रणेशी (ISI) संबंधित असलेल्या हसन अली उर्फ जट्ट रंधावा याच्या संपर्कात होता. तसेच तो हरियाणातील यूट्यूबर ज्योति मल्होत्रा आणि एहसान-उर-रहीम उर्फ दानिश यांच्या संपर्कात होता. ज्योति मल्होत्राला यापूर्वीच हेरगिरीच्या आरोपाखाली अटक करण्यात आली आहे.
तपासातून समोर आले आहे की, जसबीर सिंग याने 2020, 2021 आणि 2024 मध्ये तीन वेळा पाकिस्तानचा दौरा केला होता. त्याच्या मोबाईलमध्ये अनेक पाकिस्तानी संपर्क क्रमांक आढळले असून, त्यांची सध्या फॉरेन्सिक तपासणी सुरू आहे. ज्योति मल्होत्राच्या अटकेनंतर जसबीरने त्याच्या पाकिस्तानी हँडलर्सशी झालेल्या संपर्काचे सर्व डिजिटल पुरावे नष्ट करण्याचा प्रयत्न केला, असे डीजीपी गौरव यादव यांनी सांगितले. या अटकेमुळे पंजाब आणि हरियाणामध्ये पाकिस्तानशी संबंधित हेरगिरी नेटवर्कविरुद्धच्या कारवाईला आणखी बळ मिळाले आहे. दरम्यान, याआधी पंजाब, हरियाणा आणि उत्तर प्रदेशातून 12 जणांना अशाच हेरगिरीच्या आरोपाखाली अटक करण्यात आली आहे.
.jpeg)
Comment List