ईदच्या कालावधीत गुरांचा बाजार बंद ठेवण्याचा आदेश मागे

राज्यात कायद्यानुसार गोवंश हत्या बंदी आहे. या कायद्याचा आधार घेऊन राज्यातील गुरांचे बाजार बंद करण्याचे पत्र गोसेवा आयोगाने जारी केले होते. ईदच्याच कालावधीत ही बंदी घातली गेल्याने मुस्लिम समाजाने त्यावर नाराजी व्यक्त केली होती. त्यानंतर शासनमान्य आयोगाने काढलेले हे वादग्रस्त पत्र मागे घेण्याची नामुष्की महायुती सरकारवर आली.

मुख्यमंत्री देवेंद्र फडणवीस यांनी गोसेवा आयोगाचे पत्र मागे घेतल्याची माहिती दिली. बकरी ईदच्या पार्श्वभूमीवर 3 जून ते 8 जून दरम्यान राज्यातील गुरांचे बाजार बंद ठेवावेत असे आदेश या पत्राद्वारे आयोगाने कृषी उत्पन्न बाजार समित्यांना दिले होते. त्यामुळे ईदसाठी कुर्बानीची परंपरा राखण्यासाठी बकरी मिळणे कठीण झाले होते.

ईद सणानिमित्त कायदा-सुव्यवस्थेच्या अनुषंगाने मुख्यमंत्री देवेंद्र फडणवीस यांनी आढावा बैठक घेतली. त्या बैठकीत मुस्लिम समाजातील आमदारांनी गोसेवा आयोगाचे पत्र मागे घ्यावे अशी विनंती केली होती. तसेच गोवंशाच्या नावाखाली काही संघटना बिगर गोवंश जनावरांच्या वाहतुकीला अडथळे आणतात, हप्ते घेतात, वाहन चालकांना मारहाण करतात. अशी बेकायदेशीर कामे करणाऱ्या घटकांचा बंदोबस्त करावा, अशी मागणीही केली.

Tags:

About The Author

Manisha Thorat- Pisal

सौ. मनिषा-थोरात-पिसाळ गेल्या १२ वर्षांपासून पत्रकारिता क्षेत्रात कार्यरत आहेत. ‘‘न्यूज एक्सप्रसे मराठी’’ या पुणे जिल्ह्यातील आघाडीच्या न्यूज पोर्टलच्या कार्यकारी संपादक म्हणून जबाबदारी सांभाळत आहेत. सामाजिक, राजकीय, शैक्षणिक आणि औद्योगिक क्षेत्रातील विविध समाजपयोगी उपक्रमांमध्ये त्यांनी योगदान दिले आहे.