ब्राझीलमधील बेलेम शहरात गुरुवारी संयुक्त राष्ट्रांची COP30 हवामान परिषदेच्या मुख्य ठिकाणी आग लागल्याची घटना समोर आली आहे. या आगीत 13 जण जखमी झाले असून त्यांना उपचारासाठी रुग्णालयात दाखल करण्यात आले आहे. आगीच्या घटनेनंतर सदर परिसर तात्काळ रिकामा करण्यात आला. घटनेवेळी हिंदुस्थानचे पर्यावरण मंत्री भूपेंद्र यादव प्रतिनिधी मंडळासोबत ब्लू झोनमध्ये होते, परंतु ते आणि इतर अधिकारी सुरक्षितपणे बाहेर निघून गेले. मायक्रोव्हेवमुळे ही आग लागली असावी, असा प्राथमिक अंदाज वर्तवण्यात येत आहे.
आग लागताच एकच गोंधळ उडाला. सर्वांची जीव वाचवण्यासाठी पळापळ सुरू झाली. धुरामुळे श्वास गुदमरल्याने 13 जणांना रुग्णालयात दाखल करण्यात आले आहे. डॉक्टर त्यांच्या प्रकृतीवर लक्ष ठेवून आहेत आणि त्यांना योग्य वैद्यकीय मदत पुरवण्यात आली आहे, असे ब्राझीलच्या पर्यटन मंत्र्यांनी सांगितले. यावेळी संयुक्त राष्ट्रांचे सरचिटणीस अँटोनियो गुटेरेस घटनास्थळी उपस्थित होते. सुरक्षा पथकाने त्यांना तात्काळ बाहेर काढले. काही वेळात आगीवर नियंत्रण मिळवण्यास यश आले. सुदैवाने यात कोणतीही जीवितहानी झाली नाही.
Comment List