दिल्लीतील तीन शाळांना ईमेलद्वारे बॉम्बने उडवण्याची धमकी

लाल किल्ल्याजवळील कार बॉम्बस्फोटानंतर भीतीचे वातावरण असताना आता नवी दिल्लीत तीन शाळांना बॉम्बने उडवण्याची धमकी देण्यात आली आहे. त्यामुळे शाळांमध्ये एकच गोंधळ उडाला आहे. ईमेलच्या माध्यमातून तीन शाळांना गुरुवारी सकाळी बॉम्बने उडविण्याचा धमकी देण्यात आली. यानंतर पोलीस आणि बॉम्ब शोधक पथकाने झडती घेतली असता काहीच संशयास्पदक आढळलेले नाही. पोलीस या प्रकरणाचा अधिक तपास करत आहेत.

चाणक्यपुरी येथील संस्कृती पब्लिक स्कूल, ब्रिटिश पब्लिक स्कूल आणि बाराखंबा येथील मॉडर्न पब्लिक स्कूलच्या मुख्याध्यापकांना एक निनावी ईमेल आला होता. त्यात शाळांच्या वर्गांमध्ये बॉम्ब ठेवण्यात आला असून त्याचा कधीही स्फोट होऊ शकतो असे म्हटले होते. मुख्याध्यापकांनी तत्काळ याबाबत स्थानिक पोलिस स्टेशन, अग्निशमन विभाग, बॉम्ब पथक, श्वान पथक आणि कॅट रुग्णवाहिका यांना तात्काळ कळवण्यात आले. काही वेळातच स्थानिक पोलिस स्टेशन व्यतिरिक्त सर्व विभागांचे पथक शाळांमध्ये पोहोचले.

शाळा रिकामी करून कसून तपासणी करण्यात आली. मात्र बॉम्बसारखे काहीही आढळले नाही. त्यामुळे तो ईमेल खोटा असल्याचे सांगितले. डीसीपी म्हणाले की, जीमेल अकाउंटची चौकशी केली जात आहे. तपासासाठी पोलिस स्टेशनच्या सायबर सेललाही तैनात करण्यात आले आहे.