मामाने भाचीला लोकलमधून फेकून दिल्याने तिचा जागीच मृत्यू झाल्याची घटना भाईंदर-नालासोपारा दरम्यान घडली आहे. कोमल सोनार असे या 16 वर्षीय दुर्दैवी भाचीचे नाव असून मामा अर्जुन सोनी (20) याला पोलिसांनी अटक केली आहे. त्याने कोमलला लोकलमधून का ढकलून दिले याचा शोध घेण्यात येत असून अर्जुन याला आज न्यायालयात हजर केले असता त्याला तीन दिवसांची पोलीस कोठडी सुनावली आहे.
कोमल ही मानखुर्द येथे राहत होती. मागील दोन दिवसांपूर्वी ती वसई पूर्वच्या वालीव परिसरात वास्तव्यास असलेल्या मामाच्या घरी आली होती. 15 नोव्हेंबर रोजी कोणालाही न सांगता ती घरातून निघून गेली. नातेवाईकांनी शोधाशोध करूनही तिचा थांगपत्ता लागला नाही. मामा अर्जुन सोनी हा भाची कोमल हिला भाईंदरवरून नालासोपारा येथे लोकलने घेऊन निघाला होता. लोकल नायगाव-भाईंदर दरम्यान पोहोचताच अर्जुन याने भाचीला धावत्या लोकलमधून ढकलून दिले. त्यात तिचा मृत्यू झाला.
नेमके कारण काय?
याप्रकरणी सुरुवातीला वसई रेल्वे पोलीस ठाण्यात अपघाताची नोंद करण्यात आली होती. त्यानंतर पुढील चौकशीसाठी हे प्रकरण वालीव पोलिसांकडे वर्ग करण्यात आले असल्याची माहिती रेल्वे पोलीस ठाण्याचे वरिष्ठ पोलिस निरीक्षक भगवान डांगे यांनी दिली. मुलगी वालीव पोलिसांच्या हद्दीतून बेपत्ता झाली असल्याने या प्रकरणाचा तपास सुरू करण्यात आला होता. सोमवारी मुलीचा मामा अर्जुन सोनी याला पोलिसांनी अटक केली. लोकलमधून प्रवास करीत असताना मामा व भाची यांच्यात बाचाबाची झाली होती का याचाही शोध पोलीस घेत आहेत. तसेच लोकलमधून ढकलून देण्यामागे नेमके कारण काय हे तपासानंतर उघडकीस येणार आहे.
Comment List