अहमदाबादमधील एअर इंडिया विमान अपघातात मृत्युमुखी पडलेल्या प्रवाशांचे मृतदेह अद्याप त्यांच्या प्रियजनांपर्यंत पोहोचलेले नाहीत. पाठवलेल्या मृतदेहांपैकी 12 मृतदेहांचे अवशेष हे बदललेले पाठवण्यात आले आहेत. लंडनमधील मृत कुटुंबियांचे काम पाहणाऱ्या वकिलांनी हे उघड केले आहे. त्यांचा दावा आहे की, लंडनमध्ये हे मृतदेह तपासण्यात आले तेव्हा ते दुसऱ्याच व्यक्तीचे असल्याचे आढळून आले. आतापर्यंत या प्रकरणात एअर इंडियाकडून कोणतीही प्रतिक्रिया आलेली नाही.
अहमदाबादमध्ये एअर इंडियाचे विमान कोसळले, यामध्ये क्रू मेंबर्स आणि इतरांसह 269 लोकांचा मृत्यू झाला होता. मृतांमध्ये 52 ब्रिटिश नागरिकांचा समावेश होता. हा अपघात इतका भयानक होता की, मृतदेहांची ओळख पटवणेही कठीण झाले होते. त्यानंतर डीएनए चाचणीद्वारे मृतदेहांची ओळख पटवण्यात आली. त्यानंतर ते मृतांच्या कुटुंबियांना पाठवण्यात आले.
लंडनमध्ये या मृतदेहांची पुन्हा तपासणी करण्यात आली. तपास अधिकारी कोरोनरने डीएनए मॅच केल्यावर ते मृतदेह दुसऱ्याच व्यक्तीचे असल्याचे निष्पन्न झाले. एक-दोन नव्हे तर 12 मृतदेहांसोबत हे घडले. मृतदेहांची अदलाबदल झाल्याचे तपासात उघड झाल्यानंतर अनेक कुटुंबांना त्यांचे अंत्यसंस्कार रद्द करावे लागले.
वकील जेम्स हीली प्रॅट यांनी डेली मेलला सांगितले की, किमान 12 ब्रिटिश नागरिकांचे अवशेष परत हिंदुस्थानामध्ये पाठवण्यात आले आहेत. ते म्हणाले की, मी एका महिन्यापासून या ब्रिटिश कुटुंबांच्या घरी बसलो आहे, या लोकांना फक्त त्यांच्या प्रियजनांचे मृतदेह परत हवे आहेत. यापैकी अनेकांना अद्याप त्यांच्या प्रियजनांचे अवशेष देखील मिळालेले नाहीत. काही लोकांना मृतदेह मिळाले आहेत पण ते त्यांच्या प्रियजनांचे नाहीत. जेम्स म्हणाले की, हा एक मोठा निष्काळजीपणा आहे, याचे स्पष्टीकरण कुटुंबियांना मिळायलाच हवे.
एअर इंडिया विमान अपघात इतका भयानक होता की मृतदेहांची ओळख पटवणेही कठीण झाले होते. तज्ञांच्या मते, इमारतीला धडकल्यानंतर विमान आगीचा गोळा बनले ज्याचे तापमान 1500 अंश सेल्सिअसपर्यंत पोहोचले. यामुळे मृतदेह पूर्णपणे जळाले होते. नंतर त्यांच्या प्रियजनांचे मृतदेह सर्व कुटुंबांना सोपवण्यासाठी डीएनए चाचणी करण्यात आली. अनेक कुटुंबांना सिव्हिल हॉस्पिटलमध्ये प्लास्टिकच्या डब्यात त्यांच्या प्रियजनांचे मृतदेह आढळले.
Comment List