हिंदी सक्तीचा आदेश टराटरा फाडला, होळी केली; उद्धव ठाकरे यांच्या उपस्थितीत आझाद मैदान येथे उग्र आंदोलन

शालेय अभ्यासक्रमात पहिलीपासूनच हिंदीची सक्ती लादणाऱ्या महायुती सरकारविरुद्ध महाराष्ट्रात संतापाची लाट उसळली. शिवसेना पक्षप्रमुख उद्धव ठाकरे यांच्या प्रमुख उपस्थितीत आझाद मैदान येथील मुंबई मराठी पत्रकार संघासमोर हिंदी सक्तीचा शासन आदेश टराटरा फाडण्यात आला. या आदेशाची जाहीर होळी करण्यात आली. या आंदोलनात मोठ्या संख्येने मराठी जनता उतरली होती. शिवसेनेसह काँग्रेस, मनसे, समविचारी संघटनांचे पदाधिकारी, मराठी भाषा अभ्यासकही आंदोलनात सहभागी झाले होते. मुंबईसह राज्यात ठिकठिकाणी शिवसैनिकांनी शासन आदेशाची होळी करून निषेध नोंदवला.

शालेय शिक्षण अभ्यास आणि कृती समन्वय समितीच्या पुढाकाराने आझाद मैदानाजवळ मुंबई मराठी पत्रकार संघाबाहेर हे आंदोलन आयोजित करण्यात आले होते. त्यासाठी हजारो मराठी नागरिक जमले होते. पोलिसांचा मोठा बंदोबस्त ठेवण्यात आला होता. दुपारी 3 वाजता उद्धव ठाकरे, शिवसेना नेते-युवासेना प्रमुख आदित्य ठाकरे, शिवसेना नेते सुभाष देसाई, शिवसेना नेते-खासदार संजय राऊत, अरविंद सावंत अनिल देसाई, माजी खासदार विनायक राऊत, विधान परिषदेचे विरोधी पक्षनेते अंबादास दानवे, आमदार ज. मो. अभ्यंकर, मनसे नेते नितीन सरदेसाई, काँग्रेस प्रदेशाध्यक्ष हर्षवर्धन सपकाळ, मराठी अभ्यास केंद्राचे अध्यक्ष दीपक पवार, भालचंद्र मुणगेकर आणि मराठी नागरिकांनी हिंदी सक्तीच्या शासकीय आदेशाची होळी केली. शिवसैनिकांनीही यावेळी शिक्षणमंत्र्यांचा प्रतिकात्मक पुतळा जाळून निषेध केला.

आता तो शासन निर्णय कुठे राहिला, त्याची होळी केली – उद्धव ठाकरे

हिंदी सक्तीचा शासन आदेश मराठी माणूस स्वीकारतच नाही, तरीही सरकार तो निर्णय लादू पाहत असेल तर आम्हीच या आदेशाची होळी करून तो विषय संपवला आहे. त्यामुळे तो शासन आदेश आहे असे मानण्याचे कारण नाही, अशी परखड भूमिका उद्धव ठाकरे यांनी यावेळी प्रसारमाध्यमांशी बोलताना मांडली.

हिंदी हटवा, मराठी वाचवा

हिंदी सक्तीविरोधातील घोषणांनी यावेळी सारा परिसर दणाणून गेला होता. हिंदी हटवा, मराठी वाचवा, महाराष्ट्रात फक्त मराठीचीच सक्ती चालणार, हिंदी सक्तीच्या आदेशाची होळी करूया, मराठी माणसाची ताकद दाखवूया, अशा घोषणा यावेळी देण्यात आल्या. आमचा विरोध हिंदी सक्तीला, हिंदी भाषेला नाही, असे फलक आंदोलनात झळकत होते.