बिहारचा तोतया आयएएस अधिकारी अटकेत

बिहार राज्याचा आयएएस अधिकारी असल्याचे भासवून एकाने सीमा शुल्क विभागाच्या बीकेसी येथील पन्हाळा शासकीय विश्रामगृहात ठगाने मुक्काम केल्याचा प्रकार समोर आला. अखेर त्या तोतया आयएएसला गुन्हे शाखेच्या युनिट 12ने ताब्यात घेऊन अटक केली. त्याला न्यायालयात हजर केले असता पोलीस कोठडी सुनावली आहे.

लक्ष्मण बागवे हे गुन्हे प्रकटीकरण शाखा युनिट 12मध्ये कार्यरत आहेत. शनिवारी पोलीस निरीक्षक बाळासाहेब राऊत, चव्हाण, सावंत, बिचकर, राणे, गोरुले यांचे पथक गस्त करत होते. गस्ती दरम्यान राऊत यांना महत्त्वाची माहिती मिळाली. मालाड पश्चिमच्या डी मॉंटी लेन येथे एक वाहन उभे आहे. त्या वाहनावर ‘भारत सरकार’ अशी पाटी लावली आहे. गाडीत बसलेला एक जण हा स्वतःला आयएएस अधिकारी असल्याचे भासवत असल्याचे समजले. त्यानंतर राऊत यांचे पथक तेथे गेले. गाडीच्या मागील सीटवर बसलेल्या एकाला ताब्यात घेतले. चंद्रमोहन प्रसाद रामबली सिंग असे त्याने त्याचे नाव सांगितले. पोलिसांनी एक वाहनदेखील ताब्यात घेऊन अटक केली.

म्हणून त्याने बनवले खोटे ओळखपत्र

चंद्रमोहन हा 2016पासून आयएएसची परीक्षा देत होता. मात्र त्याला यश आले नाही. त्याच्यासोबत त्याचे मित्र पास होऊन ते आयएएस झाले. त्याच दरम्यान त्याला गावी परीक्षा पास झाला की नाही याबाबत विचारणा करायचे. त्यामुळे त्याने ते बनावट ओळखपत्र बनवल्याचे तपासात समोर आले आहे.