पिसोरी हरणाची शिकार करणारी चौघांची टोळी अटकेत

मेढा आणि महाबळेश्वर तालुक्याच्या सीमेवरील घनदाट जंगलात पिसोरी हरणाची शिकार करणाऱया चौघांच्या टोळीला वन विभागाने शिताफीने अटक केली. या टोळीकडून शिकारीसाठी वापरण्यात येणारी गावठी बंदूक, काडतुसे, वाघर, कोयता व शिकार केलेली पिसोरी हरीण जप्त केली आहे. महाबळेश्वर, मेढा वन विभागाच्या पथकाने संयुक्तरीत्या ही कारवाई केली.

शिवाजी चंद्रकांत शिंदे, दीपक शंकर शिंदे, आदित्य दीपक शिंदे (तिघेही रा. कुरोशी, ता. महाबळेश्वर) आणि गणेश कोंडिबा कदम (रा. गोगवे, ता. महाबळेश्वर) अशी अटक करण्यात आलेल्या टोळीतील आरोपींची नावे आहेत.

महाबळेश्वरच्या घनदाट जंगलात कोणी शिकार करू नये, यासाठी वन विभागाच्या वतीने नियमित गस्त सुरू असते. या पथकाला मेढा येथील पथकाचीही मदत मिळते. आज पहाटे महाबळेश्वर व मेढा येथील वन विभागाचे कर्मचारी गस्त घालत असताना राजमार्गावरील मोळेश्वर फाटा ते सह्याद्रीनगर रस्त्यावर राखीव वनात दोन व्यक्ती संशयितरीत्या रस्त्यावर आढळून आले. वन विभागाच्या कर्मचाऱयांना त्यांचा संशय आल्याने त्यांनी दोघांची चौकशी सुरू केली. त्यांनी दिलेल्या उत्तराने वन विभागाच्या कर्मचाऱयांना संशय आला. वन विभागाच्या कर्मचाऱयांनी दोघांजवळ असलेल्या सामानाची तपासणी केली असता शिकारी टोळीचे बिंग फुटले. दोघांजवळ पिशवीत वाघर, काडतुसे व कोयता आढळून आला. हे दोघे शिकारी असल्याची वन विभागाची खात्री झाली. दोघांची कसून चौकशी केली असता त्यांचे आणखी दोन साथीदार जंगलात असल्याचे समजले. वन विभागाने त्या दोघांच्या माहितीने छापा टाकून अन्य दोघे असे चौघांना अटक केली. वन अधिकाऱयांनी त्यांच्या ताब्यातून गावठी बंदूक व बंदुकीच्या मदतीने शिकार केलेली पिसोरी हरीण व इतर साहित्य जप्त केले. या चौघांनाही महाबळेश्वर येथील विश्रामगृहावर आणले. उपवनसंरक्षक आदिती भारद्वाज यांच्या मार्गदर्शनाखाली सहायक वन संरक्षक महेश झांजुर्णे, महाबळेश्वरचे वनक्षेत्रपाल गणेश महांगडे यांनी या टोळीवर गुन्हा दाखल केला.

मेढा येथील वनक्षेत्रपाल अर्जुन गंबरे, बामणोली वनपाल नीलेश रजपूत, तापोळा वनपाल अर्चना शिंदे, वनरक्षक रमेश गडदे, अभिनंदन सावंत, लहू राऊत, स्वप्नील चौगुले, राहुल धुमाळ, स्नेहल शिंगाडे, संगीता शेळके, संदीप पाटोळे या वन विभागाच्या कर्मचाऱयांनी या मोहिमेत सहभाग घेतला. महाबळेश्वरचे वनक्षेत्रपाल गणेश महांगडे अधिक तपास करीत आहेत.