दूधगंगा पतसंस्था अपहार प्रकरणातील मुख्य आरोपी असलेल्या चेअरमन भाऊसाहेब कुटे याच्या पत्नी शकुंतला कुटे यांच्यासह मुले आणि सुनांचा जामीन अर्ज संगमनेरच्या जिल्हा न्यायालयापाठोपाठ आता मुंबई उच्च न्यायालयाच्या संभाजीनगर खंडपीठाने फेटाळला आहे. त्यामुळे शकुंतला कुटेसह अन्य आरोपींच्या अटकेचा मार्ग मोकळा झाला आहे.
संगमनेरच्या प्रतिष्ठत दूधगंगा नागरी सहकारी पतसंस्थेतील चेअरमन भाऊसाहेब कुटेसह 17 आरोपींनी 81 कोटी रुपयांचा केलेला अपहार समोर आला आहे. मुख्य आरोपी असलेल्या भाऊसाहेब कुटेने कुटुंबीय आणि नातेवाईकांच्या मदतीने हा आर्थिक घोटाळा केल्याची फिर्याद शहर पोलीस ठाण्यात दाखल आहे. मुख्य आरोपी असलेला कुटे गुन्हा दाखल झाल्यापासून कुटुंबीयांसह फरार असून, त्याच्यासह कुटुंबातील सदस्यांचा अटकपूर्व जामीन अर्ज संगमनेरच्या जिल्हा व सत्र न्यायालयाने यापूर्वीच फेटाळला होता.
अटकपूर्व जामीन अर्ज फेटाळल्याने मुख्य आरोपी असलेल्या भाऊसाहेब कुटेचा अपवाद वगळता कुटुंबातील अन्य सदस्यांनी मुंबई उच्च न्यायालयाच्या संभाजीनगर खंडपीठात धाव घेतली होती. गुरुवारी (दि. 4) या संदर्भात निर्णय झाला असून, न्यायमूर्ती एन. बी. सूर्यवंशी यांनी जामीन अर्ज फेटाळला आहे. आर्थिक गुह्याचे गंभीर स्वरूप लक्षात घेता, आरोपींना ताब्यात घेऊन त्यांची तपासकामी चौकशी करण्याची गरज असल्याचे म्हटले आहे.
कुटे याची पत्नी शकुंतला व विमल भाऊसाहेब कुटे, अमोल भाऊसाहेब कुटे, संदीप भाऊसाहेब कुटे, दादासाहेब भाऊसाहेब कुटे व सोनाली दादासाहेब कुटे यांचा समावेश होता. गेल्या काही महिन्यांपासून या जामीन अर्जावर निर्णय प्रलंबित होता. कुटे कुटुंबीयांच्या जामीन अर्जावरील निर्णयाकडे ठेवीदार, जाणकार आणि याचा तपास करणाऱया आर्थिक गुन्हे शाखेचे लक्ष लागले होते. खंडपीठाचा निर्णय आल्याने आता गुन्हे शाखेचे अधिकारी गेल्या अनेक दिवसांपासून फरार असलेल्या भाऊसाहेब कुटेसह त्याच्या कुटुंबीयांना अटक करून ठेवीदारांना दिलासा देणार का, असा प्रश्न आहे.
.jpeg)
Comment List