माझा नेता पलटूराम निघाला, कार्यकर्त्यांचे विजय शिवतारे यांना खरमरीत पत्र

गेल्या पंधरा दिवसांपूर्वी बारामती लोकसभा मतदारसंघात फिरुन अजित पवार यांच्याविरोधात दंड थोपटणारे मिंधे गटाचे विजय शिवतारे यांचे बंड थंड झाले. त्यामुळे नाराज कार्यकर्त्यांने शिवतारे यांना खरमरीत पत्र लिहून चांगलेच सुनावले आहे. अजित पवार याला माझा आवाका कळेल म्हणणारे तुम्ही आवाका दाखविण्याच्या आधीच ‘शेपूट’ घातले. आता त्या 5 लाख 80 हजार पवारविरोधी मतदारांनी नेमके काय करायचे? असा सवाल केला आहे.

‘बापू, 13 मार्च 2024 रोजी तुम्ही बंडाची भूमिका घेऊन बारामती लोकसभेची निवडणूक ‘अपक्ष’ लढवण्याचा निर्धार केला. त्यानंतर तुम्ही खंडोबाच्या साक्षीने ‘एल्गार’ पुकारला. ‘बारामती कोणाची जाहागिरी नाही’ असे तुमची अनेक विधाने गाजली. परंतु घोडा-मैदान जवळ आले असताना तुम्ही माघार घेतली. त्यामुळे आमचीही मोठी अडचण झाली, असे पत्रात म्हटले आहे.

फटा पोस्टर निकला चूहा

‘बापू, मी तुमचा कट्टर समर्थक आहे. तुम्ही म्हणाल तसे आजपर्यंत करीत आलो आहे. पण, काल माझा नेता असा संधीसाधू, लेचापेचा निघाला, याचं फार वाईट वाटलं. तुमचा बोलविता धनी दुसराच कुणी होता. तुम्ही कुणाची स्क्रिप्ट वाचत होतात? आता तुमची वैयक्तिक भूमिका काय? तुम्ही म्हणजे ‘फटा पोस्टर निकला चूहा’ नव्हेत का? याचीही उत्तरे दिलीच पाहिजेत, असेही पत्रात म्हटले आहे.