नितीन गडकरी यांना लोकमान्य टिळक पुरस्कार

लोकमान्य टिळक स्मारक ट्रस्टच्या (हिंद स्वराज्य संघ) वतीने देण्यात येणारा प्रतिष्ठेचा लोकमान्य टिळक राष्ट्रीय पुरस्कार यंदा केंद्रीय रस्ते वाहतूक मंत्री नितीन गडकरी यांना जाहीर झाला आहे. 1 ऑगस्ट रोजी लोकमान्य टिळक यांची 105वी पुण्यतिथी आहे. त्या दिवशी या पुरस्काराचे वितरण होणार आहे.

टिळक स्मारक ट्रस्टचे अध्यक्ष डॉ. रोहित टिळक यांनी पत्रकार परिषदेत ही माहिती दिली. पुरस्कार वितरण सोहळ्यास मुख्यमंत्री देवेंद्र फडणवीस, दोन्ही उपमुख्यमंत्री, माजी केंद्रीय गृहमंत्री सुशीलकुमार शिंदे उपस्थित राहणार आहेत. डॉ. रोहित टिळक यांच्या हस्ते आणि प्रमुख पाहुण्यांच्या उपस्थितीत पुरस्काराचे वितरण होईल. टिमविच्या कुलगुरू व टिळक स्मारक ट्रस्टच्या विश्वस्त डॉ. गीताली टिळक, टिमवि ट्रस्टच्या आणि टिळक स्मारक ट्रस्टच्या डॉ. प्रणति रोहित टिळक, विश्वस्त रामचंद्र, विश्वस्त सरिता साठे या वेळी उपस्थित असतील. स्मृतीचिन्ह, सन्मानपत्र आणि एक लाख रुपये, असे लोकमान्य टिळक राष्ट्रीय पुरस्काराचे स्वरूप आहे.

लोकमान्य टिळक राष्ट्रीय सन्मान देऊन गौरविलेल्या आजवरच्या पुरस्कारार्थींच्या जीवन कार्याचा आढावा घेणारा इंग्रजी ग्रंथ तयार करण्यात आला आहे. या ग्रंथाचे प्रकाशन या वेळी होणार आहे. रोहित टिळक म्हणाले, लोकमान्यांच्या सतुःसूत्रीतील स्वदेशीचा स्वीकार करत रस्त्यांच्या माध्यमातून राष्ट्र उभारणीसाठी नितीन गडकरी कार्यरत आहेत. विविध प्रकारच्या वाहन निर्मितीत स्वदेशीचा पुरस्कार व प्रसार त्यांच्याकडून होत आहे. सार्वजनिक-खासगी भागीदारीच्या प्रारूपातून त्यांनी देशातील पायाभूत सुविधांच्या विकासात महत्त्वपूर्ण योगदान दिले आहे. नमामी गंगा प्रकल्पाला त्यांच्याच प्रयत्नाने लोकचळवळीचे स्वरूप आले. देशाच्या विकासासाठी त्यांनी दिलेले योगदान लक्षात घेऊन त्यांची 2025च्या लोकमान्य टिळक राष्ट्रीय पुरस्कारासाठी निवड करण्यात आली आहे.

दोन वर्षांपूर्वी पंतप्रधान मोदींना पुरस्कार मिळाला होता

1983पासून हा पुरस्कार प्रदान करण्यात येतो. पहिल्या वर्षी. एस.एम. जोशी यांना हा पुरस्कार प्रदान करण्यात आला. आतापर्यंत कॉम्रेड डांगे, इंदिरा गांधी, डॉ. मनमोहन सिंग, अटलबिहारी वाजपेयी, प्रणव मुखर्जी, ज्येष्ठ नेते शरद पवार, राहुकुमार बजाज, बाबा कल्याणी, डॉ. सायरस पुनावाला यांच्यासह अन्य दिग्गजांना हा पुरस्कार देऊन गौरविण्यात आले आहे. दोन वर्षांपूर्वी पंतप्रधान नरेंद्र मोदी यांना लोकमान्य टिळक राष्ट्रीय पुरस्कार प्रदान करण्यात आला होता. या वर्षी केंद्रीय मंत्री नितीन गडकरी यांना सन्मानित करण्यात येणार आहे.