देशाचे सरन्यायाधीश भूषण गवई यांचा महाराष्ट्राच्या वतीने विधीमंडळात सत्कार करण्यात आला. त्यावेळी विरोधी पक्षांकडून त्यांना विधीमंडळाबाबतची माहिती देण्यात आली. विधीमंडळात विरोधी पक्षांचा आवाज दाबण्यात येत आहे. अद्याप विरोधी पक्षनेत्याची निवड करण्यात आलेली नाही. तसेच राज्यात सुरू असलेल्या संवैधानिक गोंधळाबाबतचे निवेदन सरन्यायाधीश भूषण गवई यांना देण्यात आले. याबाबत शिवसेना (उद्धव बाळासाहेब ठाकरे) नेते, युवासेनाप्रमुख आदित्य ठाकरे यांनी माहिती दिली.
देशाचे सरन्यायाधीश भूषण गवई यांचा महाराष्ट्राच्या वतीने विधीमंडळात सत्कार करण्यात आला. त्यांना शुभेच्छा देत आनंद व्यक्त करण्यात आला आहे. त्यावेळी आम्ही सरन्यायाधीशांना महाराष्ट्राच्या विधीमंडळात काय सुरू आहे, याबाबतची माहिती दिली. विरोधी पक्षांचा आवाज दाबण्यात येत आहे. विरोधी पक्षनेत्याशिवाय राज्यात चौथे अधिवेशन होत आहे. निवडणुका होऊन सत्ता स्थापन झाल्यानंतरही आतापर्यंत विधानसभा अध्यक्षांनी विरोधी पक्षनेत्याची निवड केली नसल्याबाबतची माहिती आम्ही सरन्यायाधीशांना दिली आहे.
विरोधी पक्षनेता निवडीचा अधिकार विधानसभा अध्यक्षांचा असतो. देशात अल्पमतातील सरकारे स्थापन झाली आहेत. दोन आमदार, खासदार असतानाही मुख्यमंत्री, पंतप्रधान झाले आहेत. आघाडी, युतीची सरकारे स्थापन झाली आहेत. राज्यात विधानसभेत 175 ते 200 आमदार सत्ताधारी बाकावर असतानाही सत्ताधारी पक्षांना विरोधी पक्षांची भीती वाटत आहे. सत्ताधाऱ्यांना विरोधी पक्षांची एवढी भीती वाटते की, ते विरोधी पक्षनेतेपद देऊ शकत नाही. याबाबतचे निवेदनाचे पत्रही आम्ही सरन्यायाधीश भूषण गवई यांना दिले आहे.
शिवसेना (उद्धव बाळासाहेब ठाकरे) आणि राष्ट्रवादी काँग्रेस शरदचंद्र पवार पक्षाकडूनही त्यांना देण्यात आले आहे. राज्यात संवैधानिक गडबड, गोंधळ झाला आहे. चार पक्ष दोन पक्षांच्या नावाने आहेत. आता ही गडबड थांबवण्याची गरज आहे. ही राजकीय, सामाजिक, संवैधानिक अडचण झाली आहे, ती निस्तरणे गरजेचे आहे, अशी विनंतीही आम्ही सरन्यायाधीशांना केली आहे, असे आदित्य ठाकरे यांनी सांगितले.
Comment List