भाजप पदाधिकारी डॉ. लक्ष्मण जाधव व त्याची पत्नी यांच्या सावकारकीतून झालेल्या त्रासाला कंटाळून 42 वर्षीय कपडा व्यापाऱ्याने गळफास घेऊन आत्महत्या केल्याची धक्कादायक घटना घडली आहे.
राम दिलीप फटाले (42, रा. काळा हनुमान ठाणा, बीड) असे आत्महत्या केलेल्या व्यापाऱ्याचे नाव आहे. राम फटाले हे कपडय़ाचा व्यापार करत होते. आठवडी बाजारात ते दुकान लावून कपडे विक्री करायचे. कपडा व्यवसायासाठी त्यांनी डॉ. लक्ष्मण जाधव या सावकाराकडून कर्ज घेतले होते. कर्जाची रक्कम व्याजासह देऊनदेखील जाधव पती-पत्नीकडून मानसिक त्रास देत शिवीगाळ केली जात होती. सावकाराने फटाले यांच्याकडून चेक घेतला होता. पैसे परत देऊनही आणखी पैशाची मागणी करत चेक परत देण्यास नकार दिला जात होता. याबरोबरच त्यांनी काही पतसंस्थांकडूनदेखील कर्ज घेतलेले होते. कोरोनानंतर कपडा विक्रीत घट झाली. धंदा बसला, खर्च वाढला. त्यामुळे व्याजही वाढत गेले, जानेवारी महिन्यात सावकाराच्या रकमेची परतफेडदेखील केली. शनिवारी रात्री फोनवरून सावकाराने शिवीगाळ केली. रविवारी पहाटे पाच वाजेच्या सुमारास राम फटाले यांची पत्नी सुलभा झोपेतून उठली. तोपर्यंत राम फटाले पंख्याला दोरी बांधून लटकल्याचे दिसले.
सात पानी चिठ्ठी
मृत्यूपूर्वी राम फटाले यांनी सावकार डॉ. लक्ष्मण जाधव व त्याची पत्नी यांच्या त्रासाला कंटाळून आत्महत्या करत असल्याची सात पानी चिठ्ठी लिहून ठेवली. डॉ. लक्ष्मण जाधव हा भाजपच्या भटके विमुक्त आघाडीचा जिल्हाध्यक्ष आहे. दरम्यान, या प्रकरणी पोलीस ठाण्यात गुन्हा नोंद करण्यात आला असून प्रकरणाचा पुढील तपास पोलीस निरीक्षक देविदास चव्हाण करत आहेत.
Comment List